Kryeministri Edi Rama tha se ardhja e vaskinave në Shqipëri ka lidhje direkt me të. Rama sot nuk fshehu faktin se po përdor politikisht procesin e vaksinimit, duke marrë meritat për vaksinat që ka siguruar.
“Ju mendoni se sigurimi i vaksinave nuk ka lidhje me atë që qeveris vendin, me Qeverinë dhe institucionet?”, tha Rama, duke u shprehur se ky është një nga ato momentet kur politika bën punë të mira dhe pa politikën ky proces vaksinimi nuk do të ishte realizuar.
E ndërsa më parë Kryeministri është shfaqur duke pritur vaksinat në aeroportin Nënë Tereza, apo ky proces nuk niste, nëse Edi Rama nuk shkonte në vendet e vaksinimit, sot Kreu i Qeverisë ka deklaruar publikisht se është meritë e tij ardhja e vaksinave.
Në Shqipëri qarkullojnë 4 lloje vaksinash, Pfizer, AstraZeneca, Sputnik V dhe Coronavac e kompanisë kineze Sinovac. Por dy prej vaksinave nuk janë certifikuar nga asnjë prej institucioneve ndërkombëtare si OBSH, EMA dhe FDA dhe bëhet fjalë pikërisht për ato vaksina që do të vaksinohen masivisht shqiptarët.
E ndërsa mjekët dhe arsimtarët po vaksinohen me Pfizer dhe Astrazeneca, sikundër vetë Edi Rama u vaksinua me Biontech, që konsiderohet vaksina më efikase, shqiptarët në tërësi do vaksinohen me vaksinën kineze, e cila ofron një mbrojtje prej 50 %.
Dhe duket se për Kryeministrin nuk ka rëndësi shumë cilësia, por ecja para e procesit, që duket se po përdoret politikisht dhe në kuadrin e fushatës elektorale, Rama do të shpresojë të fitojë pikë elektorale.
