Nga momenti që kryesocialisti Edi Rama shpalli listën e kandidatëve të PS-së dhe renditjen e tyre në listat shumëemërore, nisi një luftë e brendshme, mes disa prej emrave që renditen në atë që konsiderohet si zona e pasigurtë, dhe emrave preferencialë, kryesisht ministra që janë në vendet e para të listës.
Mimi Kodheli, Pandeli Majko apo Fatmir Xhafaj, rrezikojnë të jenë pjesë e Parlamentit të ardhshëm, nëse ata nnuk marrin minimalisht 10001 vota, për të shpresuar më pas zhvendosjen e listës, të emrave që mund tv marrin më pak vota.
Në pjesën preferenciale të listës përfshihen ministra apo deputetë që duket se janë shumë më të bindur ndaj Ramës, ose i kanë shërbyer atij deri në verbëri, madje shumë më tepër se ata që mund të konsiderohen si socialistët qëndrestarë.
Në rrjetet sociale ka nisur një luftë ku kandidatët publikojnë numrat që mbajnë në fletën e votimit, prej kohësh kanë nisur të kërkojnë vota individuale, në një garë me ministra që e kanë më të kollajtë të mbledhin vota, bazuar kjo te pjesa e administratës që drejtojnë.
Edi Rama sot u shfaq hapur në krah të Majkos, duke kujtuar numrin 19 që mbante në fletën e votimit, madje zgjodhi të bëjë batuta me Elisa Spiropalin.
Mimi Kodheli në anën tjetër ka nisur fushatën në rrjetet sociale, ndërsa renditet e 20, duke kërkuar votat për numrin që mban. Fatmir Xhafaj i 23 në listë gjithashtu ka nisur fushatën individuale, ndërsa në një studio televizive tha se mjaftonte 1/5 e numrave që kishte në telefon për të siguruar votat e nevojshme.
Pandeli Majko sot zgjodhi të flasë për partinë, duke u shprehur se çështja është për të vazhduar misionin e ndryshimit dhe jo për të arritur një triumf personal. Ai tha se socialistët, konkurrencën e kanë me kundërshtarët dhe jo me njëri-tjetrin.
“Kam një lloj presioni për këto zgjedhje. Jo se jam në atë pozicion në listë por e ka çdo kandidat. Këtu nuk është fjala matematike. Këtu çështja shtrohet më thelbësore. Ky ekip nuk është mbijetese por ekip shprese që bën një diferencë shumë të madhe me ekipin përballë që po përpiqet të mbijetojë në politikë. Përballë ekipit të mbijetesës ne kemi ardhur pa diskutuar me njëri-tjetrin se kush është i pari, i dyti, i treti.
Vota për secilin është në radhë të parë votë për PS, për të vazhduar këtë ndryshim që ngjan edhe si ky stadium i ri që themeli e ka te Qemal Stafa por këtu po ngrihet një gjë e re. Në Tiranë flenë krye-ëndrrat, prandaj kemi detyrimin për të bërë fushatë”, u shpreh Majko.
