Biznesmeni Gjergj Luca, i njohur për raportet e tij të afërta me kryeministrin Edi Rama, është përplasur fizikisht në Labinot, me kandidatin e PD në Elbasan për zgjedhjet e 25 Prillit, Luçiano Boçi. Vetë Boçi, sqaroi se ishte Luca ai që e sulmoi teksa po zhvillonte takime në kuadër të fushatës elektorale.
Luçiano Boçi, në një prononcim për gazetarët, bëri me dije se depozitoi kallëzim për rastin, ndërsa rrëfeu se si nisi konflikti, që e quan një “agresion me motive politike”.
Në qafën e tij dukeshin qartë të çjerra, që ish-deputeti demokrat tha se i mori në konfliktin me biznesmenin.
Deklarata
“Agresion me motive politike. Të majtët janë në panik, të frikësuar nga humbja. Isha në një takim elektoral në Labinot, ku z.Luca ka disa biznese. Kisha një takim me demokratët dhe ai është afruar duke më ofenduar dhe më pas ka pasur një përplasje fizike. Gjatë përplasjes me ka kërcënuar me jetë. Menjëherë pas incidentit i jam drejtuar organeve ligjzbatuese për të kryer procedurat”, tha Boçi për gazetarët.
“Më datë 25 Prill i zbresim nga froni i banditëve. Shqipëria nuk është vendi i banditëve, është i qytetarëve dhe do e dëshmojnë këtë në datën 25 Prill”, shtoi.
I pyetur ka besim se prokuroria do të vihet në lëvizje për këtë rast, Boçi u përgjigj: “Unë kam bërë hapat e parë ligjor, denoncimin ligjor. Është në moralin dhe përgjegjësinë e prokurorisë të vazhdojë hapat e tjerë të cilat janë hapa që duhet të reflektojnë qëndrimin e një institucioni të drejtësisë ndaj padrejtësisë, ndaj agresioneve qofshin këto politike, qofshin këto dhe jo politike. Në rastet kur kjo përplasje, kjo dhunë është toleruar, Luca ka histori të pasur përplasjesh, me njerëzit në Labinot, me grabitjet në Labinot. Nuk i ka hyrë gjemb në këmbë. Normal që i duket vetja trim, i duket vetja i mbështetur nga kryemistri, po këto trima pas datës 25 do jetë ata frikacakët që do u luten njerëzve për mëshirë”.
Luca provokon gazetaren
Ndërkohë, Gjergj Luca është paraqitur në Drejtorinë Vendore të Policisë së Elbasanit, nga tha për gazetarët se kërkoi urdhër-mbrojtje pasi ndihet i kërcënuar nga Luçiano Boçi.
Ai mohoi se e ka sulmuar dhe kërcënuar Boçin, ndërsa shtoi se ishte ai që u kërcënua nga kandidati për deputet. Megjithatë, ndryshe nga Boçi që kishte të çjerra në qafë, Luca nuk dukej të kishte ndonjë shenjë.
Në fund të intervistës, foli me tone ironizuese për një gazetare e cila e pyeti: Luçiano Boçi kishte shenjë që ishte dhunuar, por ti a ke shenja?
“Kam një shenjë në një vend që nëse do ta tregoja do të binte telefoni i kuq që ke në dorë”, tha ai.
