Deputeti Lefter Maliqi shprehet i bindur se rrotacioni politik më 25 prill do të ndodhë.
Në një intervistë për Report Tv, Lefter Maliqi i cili kandidon në Qarkun e Beratit në siglën e LSI-së ku është renditur i fundit, tha se këtë gjë e ka kërkuar vetë dhe shton se do të dalë deputet në zgjedhjet e 25 prillit.
Mbështetjen për emrin tij, Maliqi e sheh edhe tek të majtët që sipas tij janë të zhgënjyer nga PS-ja.
“E kam kërkuar vetë për shkak të ndryshimeve që kanë ndodhur në Kodin Zgjedhor, pasi tani votohet edhe kandidati. Unë do të nxjerr në pah vlerat e mia në atë qark, nëse i kam mbështetur me investime, nëse kam mbështetje popullore. E shoh si sfidë. Pretendoj se do të dal deputet në zgjedhje, dhe nëse nuk do të dal do të dal më i votuari.
E rëndësishme është që unë të punoj për njerëzit edhe këto 10 ditë që kam qenë në fushatë kam bërë të pamundurën, dhe kam një mbështetje shumë të madhe sidomos të majtët e zhgënjyer. Hera e parë në qarkun e Beratit që opozita e bashkuar të fitojë zgjedhjet, jam i bindur, kjo fushatë e bëri PS-në që të hanin kokat e veta.
I mori në qafë edhe bashkëpunëtorët e tij, gjasme të dorëhequr”, tha Maliqi.
Ai tha se edhe Kryeministri në ikje e ka vendosur emrin në një renditje të rrezikshme, pasi ai e ka të qartë se Rama humbet zgjedhjet dhe nuk do të hyjë në Parlament si opozitar.
“Ka nisur një luftë e brendshme në PS, Rama i hodhi në rrugë Arben Çukon, Koço Kokëdhimën, Sajmir Tahirin, e të tjerë gjoja deklarojnë tërheqjen, por që në fakt është djegie e bashkëpunëtorëve të tij. Rama dogji edhe Sandër Lleshajn, pasi e përdori për gazin lotsjellës. Pra i dogji të gjithë ata që i përdori dhe i shtrydhi, ndërkohë që ka besim te Ogerta Manastirliu, Arben Ahmetaj e Etilda Gjonajn me të cilët ka abuzuar për PPP”, tha Maliqi. Ai shtoi se LSI në shkallë vendi merr mbi 20 mandate.
Ai bëri një paralajmërim edhe në drejtim të Kryetarit të PD, Lulzim Basha, kur tha se “duhet të qeverisë me mend në kokë, dhe të mbajë premtimet që thotë brenda vitit të parë të qeverisjes, ndryshe do të ketë probleme edhe në qeverisje dhe në koalicion”.
