Kryeministri Edi Rama ka reaguar lidhur me përplasjen e ndodhur në Elbasan, ku simpatizantë dhe roje të kreut të qeverisë, dhunuan një grup qytetarësh, që e pritën me thirrjet “ik, ik, ik”.
Rama u pyet nga mediat sepse zgjodhi të vizitojë Elbasanin në të njëjtin orar me kreun demokrat Lulzim Basha, ndërsa u shpreh se nuk jep llogari për oraret, pasi ai dhe kreu i opozitës nuk janë armiq.
“Çfarë pyetje është kjo për orarin? Ne s´jemi armiq, mund të vijmë kur të duam”, tha Rama, duke shtuar se incidenti nuk duhej të ndodhte.
“Nuk kam pse jap llogari për orarin kur duhet të vij. Nuk kishte pse të ndodhte një gjë e tillë. Unë jam këtu për të respektuar një traditë të kësaj feste që prej kohësh është kthyer edhe në festë kombëtare. Jam këtu për të uruar të gjithë pa përjashtim që të kenë një festë të gëzuar dhe një verë të gëzuar.
Unë dhe ne po përpiqemi të bëjmë çmos që vera të jetë e lehtësuar nga pasha e rëndë prej situatës së imponuar nga armiku i padukshëm duke garantuar një vaksinim sa më intensive. Kemi filluar dje me mësuesit dhe pedagogët.
Vazhdojmë jo me ritmin e domosdoshëm me të moshuarit. Ky është mendimi i fundit para se të flejë ato orë të pakëta, që të garantojmë doza të konsiderueshme që vera të jetë si kjo ditë e bukur dhe e ardhmja e afërt të jetë e çliruar nga goditjet që virusi bën në familjet tona. Kjo është arsyeja pse jam këtu. Kjo është A-ja dhe Zh-ja e ditës sime. Ta bëjmë këtë verë sa më të lehtë dhe të çajmë rrethimin e virusit”, u shpreh Rama.
