Një ditë më parë Kryeministri Edi Rama tërhoqi vëmendjen me një gjest dhune ndaj një gazetareje, sepse ajo nuk kishte maskën anti-Covid.
Incidenti ndodhi ndërsa Rama po prononcohej për mediat lidhur me vaksinimin e arsimtarëve, ndërsa gazetarja e cila ishte në një lidhje “live” iu afrua Kryeministrit pa mbajtur maskë. Rama e shtyu, një veprim që shkaktoi reagime të shumta kundër Kryeministrit.
Ditën e sotme, pas vizitës që kreu në qendër të qytetit të Elbasanit me rastin e ‘Ditës së Verës’, kryeministri dha një prononcim për mediat, ku shoqërohej nga Ministrja e Arsimit, Evis Kushi.
Kushi ishte në krah të Ramës, pa maskë, shumë më pranë se gazetarja e Fax News, e cila një ditë më parë u shty nga Kryeministri.
Rama e dëgjoi Kushin qetësisht, as e shtyu as i tërhoqi vëmendjen. Madje pak sekonda më pas edhe vetë Kryeministri teksa mori fjalën hoqi maskën.
As Rama dhe as Kushi nuk e shtynë njëri-tjetrin, ashtu sikundër veproi Kryeministri vetëm 24 orë më parë, ndaj një gazetareje.
Duket se Rama e ka inatin me gazetarët, që herë i tall, herë i vendos nën presion dhe herë i shtyn.
