Nga Boldnews.al
Në të dyja qarqet ku kryeministri Rama është kandidat për deputet, në Vlorë dhe Durrës ka pasur probleme serioze dhe debate për personat që u përfshinë në listë. Në Vlorë, doli i pakënaqur Alket Hyseni, një personazh i gatuar në zyrat e kryeministrisë nga vetë Rama dhe i katapultuar si deputet në zonën e bregdetit, ku më vonë mori pseudonimin “Pashai i Jugut”.
Emri i tij lidhet me disa procese të dyshimta në tjetërsimin e pronave, por edhe me ndikimin e drejtëpërdrejtë në pushtetin lokal, sidomos në Sarandë me emërime në poste drejtuese të të afërmve të tij. Por një rival e pati në Vlorë dhe ai ishte Damian Gjiknuri, pa të cilin Rama nuk mund ta shohë veten në një fushatë elektorale.
Kryeministri po kërkon mandatin e tretë, duke tentuar tu mbushë mendjen shqiptarëve se ka qeverisur mirë, që ka zhvilluar vendin, që ç’rrënjësi korrupsionin, apo përballoi pandeminë më mirë se Gjermania. Megjithatë qytetarët kanë tetë vite që e dinë se çfarë ndodh me pronat e tyre dhe ato publike, kush janë “pashallarët e kuq”, që mbretërojnë në korrupsion, lidhje me pjesën e errët të botës së krimit, dhënien e tenderave të dyshimta dhe dhurimin e resurseve të Shqipërisë me konçesione.
Tashmë është koha që të hanë kokat e njëri-tjetrit. Vlora mban rekordin e ndryshimit të drejtorëve të hipotekës, tetë të tillë në vetëm katër muaj. Pasi pranonin detyrën, brenda pak ditësh jepnin dorëheqjen. Detyroheshin të firmosnin tjetërsimin e pronave, por disa bënë mirë llogaritë mes urdhrave të kryeshefave që kanë zyrën në godinën e përhimtë në Bulevardin Dëshmorët e Kombit në Tiranë dhe burgut që i priste nëse do firmosnin pa u menduar, sidomos një pronë të lakmueshme në Jalë. Gjithashtu hipoteka në Vlorë u kthye si “vend krimi” kur dhjetëra forca policie dhe agjentë civil ruanin punonjësit pasi që të gjithë ishin të kërcënuar.
Të sulmuarit dhe sulmuesit ishin të gjithë nga një krah politik dhe gjithëkush para se të tregonte armën në brez apo lëshonte kërcënim për zyrtarin të nzirrte “teserën e Rilindjes”. Ndaj ishte e vështirë edhe për kaposhët e pushtetit që të mbanin anë, sepse të gjithë ishin të tyret.
Këtë Vlora, Saranda dhe Himara nuk e harrojnë, pasi banorët aty janë bërë dëshmitarë të tjetërsimit të pronës së tyre, të rrëmbimit të bregdetit për vila dhe resorte luksoze që shërbejnë për të ngrenë “qentë e babëzitur” që vinin me kostumin e pushtetit bashkë me elemëntët e krimit që po përdoren pa rënë në sy edhe në këto momente në fushatë.
Por dy “gjela” nuk mund të rrinin në kotecin e Rilindjes. Gjiknuri apo Hyseni, kush do mbijetonte? Rama zgjodhi Gjiknurin, ndërsa superdeputetin e tij, që të “shqyente” në çdo debat publik sa herë kritikohej kryeministri, u detyrua ta flakë.
E renditi të fundit në listën e Vlorës, por Hyseni nuk pranoi, po ashtu edhe Dritan Leli kryebashkiaku i Vlorës, pasi duroi gjatë fyerjet, sulmet dhe përçmimin e Ramës dhe Gjiknurit, refuzoi të jepte dorëheqjen si kryebashkiak. Sot qarku Vlorë është në duart e Damian Gjiknurit, këtij personazhi emblematik që kudo që shkel “nuk mbin bari”, sa herë bëhet fjalë për fushatë.
Ai mund të ketë jetëgjatësi politike sa të ketë frymë Rama, por e ka të vështirë të fshijë përgjimet e publikuara në gazetën gjermane BILD, kur fliste me elementë të botës së krimit dhe për dërgimin në Dibër të disa forgonëve të mbushur me “çuna problematik”. Po ashtu edhe komunikimet në ekstazë “tërmet, tërmet mo ja q… robt” nuk ikin lehtë. Damiani nuk ndryshon dhe nuk ka sesi të ndryshojë kur edhe në Vlorë po bën fushatë duke mbajtur pas vetes “çunat problematik”, madje edhe ata që i kapi ligji i dekriminalizimit.
