Kryetarja e LSI-së, Monika Kryemadhi, i është përgjigjur me të njëjtën monedhë Kryeministrit Edi Rama, i cili sot bëri një krahasim mes kandidatëve të PS dhe opozitës për zgjedhjet e 25 prillit.
“Edhe në luftën e dytë botërore nuk ka pasur shëndetësia kaq të rrënuar dhe shkatërruar”, tha Kryemadhi, referuar Ogerta Manastirliut, ministres së Shëndetësisë, e cila kandidon në listën e PS për Tiranën.
Në vijim, Kryemadhi përmendi ministren e Drejtësisë Etilda Gjonaj, duke u shprehur “harroi që dje, të parin kishte Fatmir Xhafën dhe tani e nxori të 23-tin, Etilda Gjonaj të na tregojnë lidhjet me lojërat e fatit”.
Evis Kushit, ministres së Arsimit, e cila është e para në listën e Elbasanit, Kryemadhi i kujtoi marrëveshjen për futjen e gjuhës turke në kurrikulat shqiptare dhe anasjelltas. “Fute të detyrueshme gjuhën e njeriut që ia lëviz fijet sikur do ai vetë”, tha Kryemadhi.
Në vijim, Kryetarja e LSI u ndal te një tjetër ministre, Belinda Balluku, të cilës i kërkoi të tregojë se “çfarë lidhje ka me Fushë Krujën?”.
“Goli” i 25 prillit nuk është i LSI-së por popullit shqiptar. Socialistët do të bëjnë “golin” më të madh të jetës tënde”, tha Kryemadhi.
