Kombëtarja shqiptare rikthehet në fushën e lojës më 25 mars teksa luajmë ndeshjen e parë të eliminatoreve të Botërorit Katar 2022 në transfertë kundër Andorrës.
Tre ditë më pas përballemi me Anglinë në “Air Albania”. Shqipëria bën pjesë në grupin I, aty ku bëjnë pjesë edhe Polonia, Hungaria dhe San Marino. Pandemia ka sjellë mbylljen e stadiumeve, por në shtete të ndryshme evropiane ka nisur rikthimi gradual i tifozëve në shkallë.
Një gjë të tillë pretendon edhe FSHF, që i ka dërguar një kërkesë zyrtare Ministrisë së Shëndetësisë dhe Mbrojtjes Sociale. Federata kërkon të miratohet kërkesa për lejimin e kufizuar të tifozëve në masën 30%, që përkthehet 6500 tifozë në duelin me Anglinë.
FSHF dhe tifozët e Shqipërisë shpresojnë që përgjigja të jetë pozitive dhe një pjesë e këtyre të fundit të kthehet në stadium për të mbështetur djemtë kuqezi në ndeshjen e rëndësishme kundër “Tre Luanëve”.
