Partia Demokratike ka depozituar në KQZ listën zyrtare të kandidatëve për deputet për zgjedhjet e 25 prillit. Lista është miratuar nga Kryesia dhe Këshilli Kombëtar, ndërsa në të përfshihen edhe kryetarët e partive aleate, bazuar në marrëveshjes e firmosura mes subjekteve politike.
Me përjashtim të Nard Ndokës, i cili renditet i 8 në listën shumëemërore të Qarkut të Shkodrës, drejtuesit e partive të tjera opozitare renditen në vendet e sigurta të listës.
Agron Duka ndodhet i 2-ti në Qarkun e Durrësit, ndërsa Fatmmir Mediu, Dashamir Shehi, Shpëtim Idrizi dhe Vangjel Dule ndodhen mes 11 emrave të parë të listës shumëemërore të Tiranës.
Lulzim Basha kryeson listën e Tiranës, ndërsa ish-Kryeministri Sali Berisha renditet gjithashtu mes emrave të parë të listës së opozitës po në kryeqytet.
Në listë nuk janë përfshirë ish-deputetët Genc Pollo, Florion Mima apo Endri Hasa, ndërkohë që në lista janë vendosur ish-deputetë që nuk kanë kandiduar në 2017.
