Parlamenti nuk zgjat mandatin e komisionerëve të Vettingut. A “lobuan” motra Qirko-Balluku në Qeveri?

Nga Boldnews.al

Komisionerët e Vetingut kanë dështuar në tentativën e tyre të lobimit për të bindur Parlamentin të zgjasë mandatin e tyre, i cili përfundon në verën e vitit të ardhshëm.

Burime nga Komisioni i Pavarur i Kualifikimit (KPK) deklaruan për “Boldnews.al” se 11 anëtarët e këtij institucioni kishin varur shpresat për të qëndruar më gjatë në detyrë tek “ndërhyrja” që kryetarja e tyre, Pamela Qirko, të arrinte të siguronte mbështetjen e deputetëve.

Të njëjtat burime deklarojnë se Qirko, nëpërmjet motrës së saj, ministres së Infrastrukturës, Belinda Balluku, synonte që të merrte mbështetjen e kryetarit të Komisionit të Ligjeve, Ulsi Manja, për të bërë modifikimet e duhura ligjore sa i përket shtyrjes së përfundimit të mandave.

Madje, në zyrat e Parlamentit mendohet se ka mbërritur edhe një kërkesë formale nga ana e Komisionit të Pavarur të Kualifikimit, ku kërkohet zgjatja e mandatit të komisionerëve, me argumentin se ka mbetur edhe një numër i lartë gjyqtarësh e prokurorësh që duhet të përballen me procesin e rivlerësimit kalimtar.

Kërkesa e Qirkos dhe “ndërhyrja” e Ballukut duket se e kanë bindur kreun e Komisionit të Ligjeve, Ulsi Manja.

Por, kërkesa është përballur me refuzimin e shërbimeve ligjore të Kuvendit, të cilët i kanë sugjeruar kryetarit të Parlamentit, Gramoz Ruçi, të mos e marrë në konsideratë, pasi nuk gjen mbështetje as në Kushtetutë dhe as në ligj.

Kushtetuta e Shqipërisë, në nenin 179/b të saj, parashikon se mandati i anëtarëve të Komisionit të Pavarur të Kualifikimit është 5 vjet.

Komisionerët aktualë janë emëruar në detyrë në Korrik 2017 dhe mandati i tyre përfundon në Korrik të vitit 2022.

LEXO EDHE  Karantina e emigrantëve para zgjedhjeve, Avokati i Popullit: Anuloni vendimin

Në rast se “lobimi” Qirko-Balluku do të kishte rezultuar i suksesshëm, Parlamenti, më së paku, duhet miratonte një ndryshim në Kushtetutë, në nenin që parashikon afatin e qëndrimit në detyrë të komisionerëve.

Por, kërkesa për zgjatje mandati duket më shumë si një “dëshirë kapricioze” e komisionerëve për të siguruar benefite, sesa një shërbim për procesin e rivlerësimit.

Kjo, pasi Kushtetuta e ka parashikuar qartë dhe në mënyrë të detajuar se si vijon Vetingu për gjyqtarët e prokurorët, pas shkrirjes së Komisionit të Pavarur të Kualifikimit.

Nga Korriku 2022, kompetencat e rivlerësimit për gjyqtarët i kalojnë Këshillit të Lartë Gjyqësor. Ndërsa Vetingu i prokurorëve do të realizohet nga Këshilli i Lartë i Prokurorisë.

Po ashtu, ankimet do të vijojnë të dorëzohen në Kolegjin e Posaçëm të Apelimit, anëtarët e të cilëve kanë një mandat 9-vjeçar.

Ndërsa, nga Korriku 2022, kompetencat e institucionit të Komisionerit Publik, të cilit i përfundon gjithashtu mandati 5-vjeçar, i kalojnë drejtuesit të Strukturës së Posaçme Anti-Korrupsion, SPAK.

Në rast se, në përfundim të 9 vjetëve, ka ende ankime që presin shqyrtimin në Kolegjin e Posaçëm të Apelimit, atëherë rastet i kalojnë për shqyrtim Gjykatës Kushtetuese.

Pra, gjithçka duket se është e parashikuar deri në detaje për vijimësinë e procesit të rivlerësimit. Ndaj, kërkesa e komisionerëve të Vetingut për të qëndruar në detyrë, është pritur me skepticizëm nga shërbimet ligjore të Kuvendit, të cilat nuk kanë dhënë viston për të vijuar procedurat parlamentare.