Kryeministri i zgjedhur i Kosovës, Albin Kurti, ka nisur fushatën për mbështetjen e kandidatëve të LVV-së dega Shqipëri, në kuadër të zgjedhjeve të 25 prillit.
Gjatë prezantimit të kandidatit, Kreshnik Merzhani në Gjirokastër, Kurti u shpreh se ai është zgjedhja e duhur për parlamentin shqiptar në 25 prill.
“Ishte nder dhe kënaqësi për mua të vij për herë të tretë në Gjirokastër. E treta e vërteta. Meqenëse jam shoqëruar nga Kreshnik Merxhani nëpër rrugët dhe lokalet e Gjirokastrës është një përjetim i shumëfishtë meqenëse të duket që me të gjitha shqisat je duke e ndjerë dhe përjetuar këtë qytet të lashtë, që vazhdon të mbetet i pazhvilluar në thellësitë e tij.
Kreshnik Merxhani është një mik i ngushtë me të cilin do të vazhdoj të bashkëpunoj gjithnjë edhe më shumë. Kam besim për shkak të përgjegjësië, serioziteti, sinqeritetit, patriotizmit dhe kompetencës profesionale. Ai karakterizohet nga integriteti njerëzor, kombëtar dhe profesional. Kështu Merxhani paraqet zgjedhjen e duhur për t’u zgjedhur me 25 prill ne Kuvendin e Republikës së Shqipërisë. Kreshniku është i dashuruar me Gjirokastrën , andaj me 25 prill ka rastin t’ia kthej këtë dashuri Kreshnikut. Ai është dhe një aktivist i kulturës. Kombi është kultura e tij, historia, gjuha që duhet të jenë interes i ynë i përgjithshëm mbi çfarëdo interesi tjetër personal”, tha Kurti.
I pyetur nga gazetarët për bashkimin Kosovë-Shqipëri, Kurti shpjegoi që kjo gjë të ndodhë duhet ndryshim në Kushtetutën e Kosovës, gjë e cila nuk bëhet pa 2/3 e votave të deputetëve të pakicave.
“Së pari në Kosovë ne na mungon ligji për referendumin. Një nga zotimet që kemi pasur para zgjedhjeve të 14 shkurtit ne jemi zotuar edhe për ligjin e referendumit. Por nuk mjafton vetëm kjo. Fatkeqësisht kur është aprovuar kushtetuta e Kosovës ka një pikë që ndalon të drejtën për tu bashkuar me një shtet tjetër. Këtë nen duhet ta ndryshojmë një ditë, por nuk bëhet shpejt dhe kollaj, duke qenë se na nevojiten dhe 2/3 e votave të pakicave. Përderisa lista serbe në Kosovë i fiton këto ulëse ne nuk e ndryshojmë dot kushtetutën. Ne duam ta ndryshojmë kushtetutën një ditë, por duhet ta respektojmë kushtetueshmërinë. Duhet ta kuptojmë që serbet që nuk e mbështesin Beogradin duhet të kenë lirinë për ta shprehur vullnetin e tyre”, tha Kurti.
