Ndërsa Nikos Stathopoulos, menaxheri i lartë i “BC Partners”, flet për herë të parë në lidhje me negociatat që po zhvillohen për të marrë shumicën e aksioneve të Interit, në të vërtetë fondi më i afërt për të arritur një marrëveshje me grupin “Suning” duket se është Fondi i Investimeve Publike (Pif) i Arabisë Saudite. Me seli në kryeqytetin Rihad, ai është ndër fondet më të mëdha të pasurisë sovrane në botë, me asete totale të vlerësuara prej 347 miliardë dollarësh, teksa u themelua me qëllim të investimit në emër të qeverisë së Arabisë Saudite.
Operacionet menaxhohen nga Yassir al Rumayyan, i cili aktualisht menaxhon një portofol të përbërë nga rreth 200 pasuri të ndryshme (përfshirë aksionet e Boeing, Facebook dhe Disney). Fushat e saj të veprimit përfshijnë aviacionin, naftën, gazin dhe argëtimin. Dhe pikërisht këtu do të vinte interesi për Interin. Me sa duket, vlerësimet e vazhdueshme janë më pranë kërkesave të grupit “Nanjing”, krahasuar me ofertën e paraqitur javët e fundit nga “BC Partners”.
Sidoqoftë, në një intervistë për “Bloomberg”, kur u pyet për Interin, Stathopoulos shpjegoi: “Padyshim që nuk mund të komentoj mbi marrëveshjet që nuk janë bërë, por sigurisht që po konsiderojmë të investojmë në sport, qoftë në një kampionat apo pronësi klubi. Dhe, për mendimin tim, klubi duhet të ketë një shanse maksimale për të garuar në nivelin më të lartë”. Nga kjo pikëpamje do të ishte një lajm i mirë, duke pasur parasysh se Interi do të vazhdojë të synojë për të vendet e para në çdo kompeticion.