Pep Guardiola thotë se Manchester City është duke hyrë në një periudhë kritike 10-ditore për garën për titull. “Qytetarët” nuk munden në 27 ndeshjet e fundit në të gjitha kompeticionet dhe sot ndaj Wolves do të synojnë që ta dërgojnë numrin e fitoreve radhazi në të gjitha kompeticionet në 21. Ndeshjet e ardhshme të këtij harku kohor do të jenë edhe ato në shtëpi kundër Mançester Junajtidit dhe Sauthemptonit, përpara transfertës me Fulhamin më 13 mars, kalendar që sipas trajnerit katalanas do të vendosë shumë për shanset e tyre për titullin kampion.
Ne nuk duam të ndalemi. E dimë që janë 10 ditë të rëndësishme me Wolves, United dhe Southampton, përpara se të udhëtojmë drejt Fulhamit. Nëse do të jemi në gjendje që të bëjmë atë që duam të bëjmë, atëherë do të jetë një hap i pabesueshëm”, tha 50-vjeçari në konferencë. Ecuria momentale e City-t është një rekord për një klub anglez të elitës, por Pep thotë se nuk është ende momenti për ta shijuar atë: “Nuk kemi kohë. Kemi shumë ndeshje, luajmë çdo tri ditë. Ne duhet të pushojmë dhe punojmë për sfidën e radhës. Ditën e ndeshjes, të gjithë trajnerët thonë se kur fiton ti je i lumtur atë natë, por ditën e nesërme ti mendon për ndeshjen e radhës”.
Trajneri i West Ham, Dejvid Mojes, e cilësoi Sitin si skuadrën më të mirë në Europë këtë fundjavë, por Guardiola thotë se e tillë mund të quhesh vetëm kur në fund fiton trofe. “Skuadra më e mirë në Europë, në botë, është Bayern i Mynihut, sepse ata kanë fituar gjithçka. Në Angli, kampion është Liverpuli, kështu që ata janë më të mirët. Ti duhet të fitosh. Në shkurt dhe në mars askush nuk shpallet kampion”. Katalanasi nuk merr asgjë për të mirëqenë përpara sfidës me “Ujqërit”, të cilët i mundën dy herë sezonin e shkuar: “Historia e tyre kundër nesh tregon sesa e vështirë është. E dimë këtë. E dimë ekzaktësisht llojin e ndeshjes që duhet të luajmë. Duhet të luajmë me intensitet, por në të njëjtën kohë, të qetë. Ata kanë aftësinë për të ndëshkuar. Në dy vitet e fundit ka qenë e vështirë” /.Panoramasport
