Qeveria franceze ka ndryshuar mendim për vaksinën e AstraZeneca pasi ka lejuar përdorimin e saj edhe për personat mbi 65-vjeç. Ministri i Shëndetësisë njoftoi se personat e moshës midis 65 dhe 74 vjeç mund ta marrin këtë vaksinë. Ata të moshës mbi 75 vjeç do të marrin vaksina të Pfizer ose Moderna.
Muajin e kaluar Franca miratoi përdorimin e vaksinës vetëm për personat nën-65 vjeç, duke përmendur si argument mungesën e të dhënave për njerëzit e moshuar, raporton BBC.
Vaksina Oxford-AstraZeneca përdoret gjerësisht në të gjithë Mbretërinë e Bashkuar, por disa vende të BE-së ende po e kufizojnë atë vetëm për moshat nën 65 vjeç, përfshirë Gjermaninë, shkruan SHQIP.
Rregullatori i BE-së për barnat e ka miratuar atë për të gjitha moshat, por i takon secilit anëtar të përcaktojë si do veprojë.
Më herët, Kanadaja këshilloi kundër dhënies së vaksinës AstraZeneca për personat mbi 65 vjeç, duke thënë se të dhënat e provave klinike për atë grup moshë ishin shumë të kufizuara.
