Alfred Rushaj, një prej drejtuesve politikë të PD në Qarkun e Tiranës, tha mbrëmjen e sotme në emisionin Opinion, se me marrëveshjen e arritur mes PD dhe LSI, sot të gjithë shqiptarët janë bashkë kundër Edi Ramës.
Rushaj tha se maksimalizimi i votës nuk është vetëm matematikë.
“Te ky vendim kemi ardhur pas sondazheve që kemi bërë në terren”, tha Rushaj.
Ai tha se PD ka qenë e hapur për koalicione dhe nëse nuk është arritur qasja, kjo s’ka ndodhur për faj të Partisë Demokratike.
Rushaj tha se para nënshrkimit të marrëveshjes ka pasur diskutime lidhur me programet dhe kemi arritur në ato pika që kemi të përbashkëta.
“Do të ketë raste kur do të kandidojmë realisht me një listë të përbashkët me synim optimizimin dhe maksimalizimin e votave. Kjo do të thotë se një kandidat i LSI mund të jetë në atë të PD dhe anasjelltas”, tha Rushaj.
Sipas tij, koalicioni që kemi firmosur risjell demokracinë në vend, pasi deri më tani kemi gjithë pushtetin në dorën e një njeriu të vetëm, Edi Ramës.
“Pas Ramiz Alisë, Rama është njeriu i vetëm në 30 vjet që ka përqëndruar të gjitha pushtetet në një dorë”, tha Rushaj.
Ai tha se në qarqe të ndryshme janë bërë sondazhe, përmes të cilave ne kemi arritur në konkluzionin që ky përfaqësim me dy lista, maksimalizon votat.
