Marrëveshja PD-LSI, Duma dhe Haxhinasto japin detajet

Grida Duma, ish-deputete dhe një prej drejtuesve politikë të PD në Qarkun e Tiranës, tha mbrëmjen e sotme në emisionin Open, se koalicioni mes PD dhe LSI përfaqëson 60 % të shqiptarëve.

Duma tha se përfaqësimi me dy lista maksimalizon votën e opozitës së bashkuar.

“Unë nuk e kuptoj sepse trantohet marrëveshja mes PD dhe LSI si një artificë, kur ne kemi kaq kohë që bëjmë një opozitë të bashkuar. Nëse nuk do të bëheshin ndryshimet e njëanshme Kushtetuese, do të kishte ndodhur e njëjta gjë”, tha Duma.

Sipas saj, përfaqësimi me dy lista i opozitës së bashkuar, bën që përballë Edi Ramës ne kemi sot 280 kandidatë, dhe kjo do të thotë se do të maksimalizohet vota. Duma tha se Edi Rama me ndryshimet kushtetuese tentoi të reduktonte opozitën, por nuk ia arriti.

LEXO EDHE  Sulmi me thikë, KMSH: Besimtarët u goditën në ditë Ramazani, të zbardhet ngjarja

“Ne nuk ramë në kurthin e Ramës që të reduktoheshim në një listë kandidatësh”, tha ajo.

Ndërsa Edmond Haxhinasto, ish-deputet i LSI, duke i qëndruar të njëjtave argumente si Duma lidhur me marrëveshjen me PD, tha se kjo ishte mënyra më e mirë për të rritur identitetin e partive dhe shkohet në një elektorat shumë më të gjerë.

“Kjo është çështje fryme, nuk është matematikë e thjeshtë, është administrimi i frymes që sot ka elektorati që do rotacionin. Jam i bindur se dy partitë do të duhet të kapin këtë frymë, e cila nesër do të jetë mazhorancë”, tha Haxhinasto.