Humori i Ramës nga Brukseli, vdekjet nga Covid dhe mesazhi që pret nga 25 prilli

Nga Boldnews.al

Kryeministri Edi Rama u shfaq sot në Bruksel, i ulur në një bordurë, ndërsa bënte humor, sipas tij, me një foto të shpërndarë në rrjetet sociale.

“Ça bohet ndonjë gjë anej”, ishte dixhitura që Rama kishte zgjedhur ti bashkangjiste fotos, si për të treguar se po fliste ndoshta me ndonjë prej bashkëpunëtorëve të tij në Shqipëri.

Pak orë më pas, nga foto e postuar në rrjet nga Edi Rama, Ministria e Shëndetësisë publikoi shifrat zyrtare lidhur me të prekurit e rinj nga Covid, numrin e viktimave, të shëruarit dhe të vaksinuarit.

Dhe nëse do të bëhej një lidhje mes “humorit” të Ramës dhe shifrave të publikuara, atëherë personi që mund të ketë zgjedhur për të pyetur Kryeministri se çfarë bëhet këtej, meqë ai ishte andej, mund t´i thoshte: “far gjoje, 20 vetë vdiqën nga korona, shifrat e të infektuarve i ulëm pak se pothuajse përgjysmuam testet”.

Ky është modeli që ka qeverisur Shqipërinë për 8 vite, që kërkon të ketë edhe një mandat të tretë po si Kryeministër dhe që timonin, dajren, çitjanet, i ka zëvendësuar me uljen në një bordurë, jo në Tiranë, si dikur para viteve ´90, por në Bruksel.

Mund të shfaqej edhe duke ngrënë fara dhe ti përshtynte ato në trotuar, apo duke konsumuar diçka tjetër, si për tu dukur një njeri i zakonshëm, pa mantelin e Kryeministrit, edhe pse mbi supe ka ca përgjegjësi shumë më shumë se sa ai personazhi që kopjon duke marrë në telefon dhe pyet “ça bohet ndonjë gjë anej”.

Edi Kryeministër dhe Edi qytetar janë dy gjëra shumë larg njëra-tjetrës. I pari me vendimet që merr dhe politikat që firmos, kuptohet kur nuk ia ngec bie fjala Erion Braçes për firmë, mund të marrë jetë njerëzish, njëlloj sikundër po raportohet çdo ditë nga Ministria e Shëndetësisë.

LEXO EDHE  Bardhi: Ja çfarë u gjet në automjetin e bllokuar nga struktura e mbrojtjes së votave

Po kështu, Edi Kryeministër mund të të lerë në çadër jo 3 dimra por edhe 10 të tillë, nëse fatkeqësisht tërmeti mund të shembë banesën.

Edi Kryeministër mund të të lerë edhe pa punë, nëse zgjohet në mëngjes dhe vendos të mbyllë gjithçka në kuadrin e masave anti-Covid, të të çojë në faliment dhe pastaj të marrë telefonin, të zgërdhihet, tallet dhe të pyesë për kuriozitet ça bohet noj gjo.

Edi qytetar nuk i prish punë njeriu, maksimumi mund të kthehet në një shqetësim për familjen e tij, të mbyllet në atë studion ku pikturon, të zhgarravisë letrat dhe muret, të bërtasë dhe ulërasë brenda banesës, të ulet në bordura, dhe të tallet sa të ketë qejf, me miqtë e tij, nëse ka ndonjë të tillë.

Në fakt sot u shfaq në atë foto Edi Rama, me ofiqin e Kryeministrit, që ndoshta tentoi të shfaqet si një njeri i zakonshëm në rrugët e Brukselit. Si të tillë, pra pa mantelin e kryeqeveritarit shqiptar, nuk do e priste asnjë prej zyrtarëve të BE-së, që u munduan ti kujtojnë kushtet që ka përpara ky vend dhe mbi të gjitha atë që Rama ka pikë të dobët, zgjedhjet e lira dhe të ndershme.

Gallata e Ramës nga Brukseli nuk uli as numrin e viktimave nga Covid, as të infektuarit e rinj, as shtoi të vaksinuarit dhe as shtoi dozat e vaksinave, mbërritja e të cilave u shty me 24 orë.

Ajo mund të ketë kënaqur Edin si qytetar dhe mund ta ketë bërë të ndjehet mirë. Ndoshta ky është mesazhi që i duhet dhënë nga qytetarët më 25 prill, t´i heqin mantelin e Kryeministrit dhe ta lenë Edin si qytetar, i cili mund të ulet në çdo bordurë dhe të bëjë humor, nëse gjen dikë që i përgjigjet në telefon.