Kredia e re ra me 15% për muajin janar

Sektori bankar dha 11.4 miliardë lekë ose rreth 92 milionë euro kredi të re gjatë muajit Janar.

Të dhënat e Bankës së Shqipërisë tregojnë se kredia e re pësoi një rënie me dy miliardë lekë ose rreth 15% krahasuar me Janarin e vitit të kaluar.

Po të krahasojmë shifrat me Janarin e viteve të mëparshme, kredia e re ka pësuar rënie për të tretin vit radhazi dhe është njëkohësisht në nivelin më të ulët të gjashtë viteve të fundit. Rënia u përcaktua nga një ritëm më i ulët i disbursimeve në segmentin e biznesit. Kredia e re për sipërmarrjet kishte vlerën e 7.4 miliardë lekëve, pothuajse 20% më pak krahasuar me janarin e vitit të kaluar.

Ndërsa për individët vlera e kredisë së re ishte pothuajse në të njëjtat nivele me një vit më parë, duke u konfirmuar si segmenti më i qëndrueshëm i tregut edhe në këtë fillim viti. Rënia e kredisë për muajin janar sidoqoftë mund të intepretohet si zhvillim brenda një intervali të luhatshmërisë normale të kreditimit, edhe duke pasur parasysh që në fillim të vitit të kaluar ekonomia ende nuk ishte prekur nga pasojat e pandemisë. Për më tepër, kjo rënie pason ecurinë mjaft pozitive të Dhjetorit 2020, kur kredia e re mujore shënoi vlerën më të lartë në katër vjet.

Rënia e kredisë së re dha efekt edhe në ecurinë progresive të stokut të kredisë, që në fund të janarit kishte vlerën e 606.4 miliardë lekëve, rreth 2.6 miliardë lekë më pak krahasuar me fundin e dhjetorit 2020.

Edhe në terma të tepricës së kredisë, rënia u përcaktua kryesisht nga një zvogëlim i lehtë në segmentin e biznesit, ndërsa vlera e kredisë për individë ishte në vlera të përafërta me fundin e vitit 2020. Me bazë vjetore, portofoli i kredisë ngelet në rritje vjetore pozitive, me rreth 6.6% më shumë. Po ta krahasojmë vlerën e portofolit krahasuar me një vit më parë, në segmentin e individëve rritja është pranë vlerave mesatare të rritjes totale të kredisë, bizneset private kanë një rritje më të lartë, me mbi 10%, ndërsa rënie të ndjeshme ka pësuar kredia për ndërmarrjet publike, me 39% më pak.

LEXO EDHE  Ambasadori gjerman në Tiranë: Qytetarët të votojnë, partitë të pengojnë çdo formë të manipulimit zgjedhor

Në gjysmën e dytë të vitit 2020, kredia për ekonominë u ndikua më pak nga sa pritej nga efektet e krizës ekonomike që solli pandemia e Covid 19. Sektori bankar për të gjithë vitin 2020 dha 245.6 miliardë lekë kredi të re, në rënie të lehtë me 0.85% krahasuar me vitin 2019. Rënia u përcaktua nga frenimi i kredidhënies në periudhën mes muajve Mars dhe Maj, për shkak të kufizimeve drastike që u vendosën për të frenuar përhapjen e epidemisë së Covid-19. Ndërsa për periudhën Qershor-Dhjetor, kredia e re u rrit pothuajse me 11% krahasuar me të njëjtën periudhë të një viti më parë.

Vijimësia e rritjes së kreditimit u mbështet nga gjendja e shëndetshme e sektorit bankar, nga masat rregullatore të Bankës së Shqipërisë dhe, pjesërisht, edhe nga skemat e garancisë të vendosura në dispozicion nga qeveria shqiptare. Për vitin 2021, bankierët janë optimistë se kredia do të vazhdojë rimëkëmbjen, e mbështetur nga kthim i pritshëm i rritjes ekonomike dhe nga zbutja graduale e masave kufizuese për të frenimin e përhapjes së pandemisë. /Monitor/