Industria e rënda ka shënuar rënie të fortë vitin e kaluar si në volumet e prodhimit dhe vlerën e shitjeve, raportoi sot INSTAT.
Nafta, hekuri dhe xeherorët e kromit e bakrit kanë pësuar rënie të fortë si në sasi ashtu edhe në vlerë, teksa shihet se vetëm disa produkte të konsumit masiv si pijet dhe uji mineral kanë shënuar rritje në raport me 2023.
Të dhënat tregojnë se rënia më e madhe u regjistrua te nafta bruto, ku prodhimi zbriti nga 891 mijë tonë në vitin 2023 në 716 mijë tonë në 2024, ndërsa vlera e shitjeve ra nga 39.3 miliardë lekë në 29.9 miliardë lekë ose me 24%.
Hekuri bruto shënoi gjithashtu një tkurrje të fortë, duke u ulur nga 474 mijë tonë në 343 mijë tonë, me vlerën e shitjeve që ra nga 33.1 miliardë lekë në vetëm 20.2 miliardë lekë ose me tkurrje 39%.
Edhe prodhimi i xeherorëve të kromit pësoi një tkurrje prej mbi 230 mijë tonësh, ndërsa vlera e shitjeve ra me mbi 5 miliardë lekë. Tek xeherorët e bakrit, sasia e prodhuar u rrit lehtë, por vlera e shitjeve u përgjysmua, duke zbritur nga 12.6 miliardë lekë në 6.3 miliardë lekë ose 27% prej rënies së çmimeve në tregjet ndërkombëtare.
Në industrinë e materialeve të ndërtimit, çimentoja ra nga 2.17 milionë tonë në 1.94 milionë tonë, ndërsa betoni i gatshëm mbeti pothuajse në të njëjtat nivele si një vit më parë, me vlerë shitjesh rreth 13 miliardë lekë.
Në kahun tjetër, disa kategori shënuan përmirësim. Uji mineral me rritje 26%dhe pijet joalkoolike patën rritje të dukshme si në prodhim, ashtu edhe në vlerë.
Prodhimi i ujit mineral u rrit me mbi 1.1 milion hektolitra, duke arritur në gati 5 milionë hektolitra, ndërsa pijet joalkoolike shënuan një rritje prej rreth 280 mijë hektolitra.
Të dyja kategoritë sollën një rritje të të ardhurave mbi 1 miliardë lekë. Pozitiv ishte edhe treguesi i salsiçeve dhe i sistemeve elektrike për automjete, të cilat shënuan rritje të lehtë krahasuar me vitin e kaluar./MONITOR
