Javën e kaluar Banka e Shqipërisë rifilloi pas pothuajse një viti programin e ankandeve për blerjen e valutës. Shuma e parashikuar për t’u blerë në raundin e parë të ankandit ishte mes 4 dhe 6 milionë eurove.
Banka e Shqipërisë vendosi të blejë në këtë raund 4.5 milionë euro, me një kurs që ishte në intervalin mes 123.65 dhe 123.8 lekë, ndërsa ushtroi edhe opsionin e blerjes në raundin e dytë të një shume prej 2.3 milionë eurosh, me një kurs 123.74 lekë. Në total, në ankandin e parë të vitit 2021 Banka e Shqipërisë bleu gjithsej 6.8 milionë euro. Kjo sasi është më e ulët krahasuar me ankandin e parë të vitit 2020, kur banka qendrore pati blerë 9.7 milionë euro.
Shpërthimi i krizës së Covid-19 në mars të vitit të kaluar solli një zhvlerësim të shpejtë të lekut në kursin e këmbimit me euron, me rreth 7% në dy javë. Banka e Shqipërisë ndërhyri duke shitur 20.4 milionë euro me qëllim stabilizimin e kursit dhe paralelisht vendosi të pezullonte të gjithë ankandet e planifikuara vjetore, për të mos krijuar kërkesë shtesë për euro në tregun valutor.
Ndërhyrja e Bankës së Shqipërisë rezultoi e efektshme dhe kursi i këmbimit nuk pësoi luahtje të mëdha. Banka qendrore vendosi të rifillojë këtë vit ankandet e blerjes së valutës, në funksion të menaxhimit të rezervës valutore. Për këtë qëllim janë planifikuar 14 ankande, ku shuma totale e parashikuar për t’u blerë në raundin e parë është midis 56 dhe 84 milionë eurove. Por, shuma totale mund të jetë edhe më e madhe, sepse në shumicën e rasteve Banka e Shqipërisë ushtron opsionin e blerjes në një raund të dytë.
Shumat e blera në ankande nga Banka e Shqipërisë u rritën ndjeshëm pas vitit 2017 dhe arritën shifrën rekord të gati 155 milionë eurove në vitin 2019. Për vitin e kaluar, banka qendrore zhvilloi vetëm dy ankande me një shumë totale të blerë prej 13.7 milionë eurosh.
Në fund të vitit 2020, rezerva valutore e Bankës së Shqipërisë kishte vlerën e 3.94 miliardë eurove, në rritje vjetore me 17.3%. Në pjesën dërrmuese, rezerva valutore mbahet në obligacione dhe në depozita, ndërsa një pakicë konsiston në rezerva ari dhe të drejta tërheqjeje (SDR) në Fondin Monetar Ndërkombëtar.
Qëllimi kryesor i mbajtjes së rezervës valutore është mbulimi i nevojave emergjente që mund të ketë ekonomia për valutë të huaj, por edhe shmangia e çrregullimeve të tregut të brendshëm valutor, si edhe përmbushja e objektivave të politikës monetare ose të stabilitetit financiar. Me vlerat aktuale, madhësia e rezervës valutore të vendit është plotësisht e mjaftueshme në raport me objektivat kryesorë të saj, ku më kryesorët janë mbulimi i katër muajve importe dhe i 100% të borxhit të jashtëm afatshkurtër. /Monitor/
