Kryeministri Edi Rama, njëherazi edhe kryetar i PS-së, u shpreh sot se kjo parti e ka koalicionin me qytetarët. Rama mblodhi sot shtabin elektoral të PS-së, ku përfshihen drejtuesit politikë sipas qarqeve, ndërsa theksoi se rregullat e lojës janë përcaktuar bashkarisht.
Rama nuk kurseu akuzat në drejtim të Presidentit Ilir Meta, për të cilin tha se ai flet me gjuhë rruge dhe lëviz natën për qëllime elektorale.
Ai e konsideroi si ilegale veprimtarinë e Kreut të Shtetit, duke u shprehur se ajo nuk ka nevojë për komente. Kryeministri tha se Meta ka humbur marrëdhëniet me postin, por edhe me trutë e kokës. “Të gjithë do e dënojmë Ilir Metën me votë më 25 prill”, tha Rama.
Sipas tij, Presideti nuk po kryen detyrën në lartësinë që i cakton Kushtetuta, ndërsa shtoi se zyra e Kreut të Shtetit është kthyer në funksion të ndërmarrjes politike që drejton bashkëshortja e tij.
Lidhur me caktimin e kandidatëve për deputet nga PS, Rama tha se secili drejtues qarku bën propozimin lidhur me skuadrën në nivel qarku. Kreu i PS shtoi se kjo parti u ka hapur dyert të rinjve për anëtarësim dhe përfaqësim.
