Nga Boldnews.al
Ndërsa ishte përpara presidentit turk Rexhep Taip Erdogan, kryeministri Edi Rama nuk e përmbajti veten nga “emocionet e thella”, kur mësoi se qeveria turke do të ndërtonte një spital në Fier brenda tre muajsh. Aty bëri një gabim ndërsa sfidoi Erdogan se do vinte bast se ishte e vështirë të ndërtohej aq shpejt, kjo vepër e “madhe” njëkatëshe me materiale parafabrikate…
Për një musliman si Erdogan, basti është haram, por Rama e bëri atë “gabim” duke mos menduar gjatë, sepse ai spital i vlen për fushatën e 25 prillit, qoftë ajo edhe një karabina e sajuar në një periudhë të shpejtë. Kjo është derexheja ku ka rënë qeveria, e cila para premtimit për “shëndetësi falas” në vitin 2013 kur mori pushtetin, sot vjen me një bilanc të një shëndetësie të mbytur nga mitmarrja në spitale dhe korrupsioni marramendës në konçesione të përfunduara në duart e pak oligarkëve.
Me një spital qyl po tenton të mbajë një fushatë të lodhur përsa i përket çështjes shëndetësi, sepse kushdo qytetar që nuk i ka mundësitë të kurohet jashtë vendit, apo në spitalet tona private e ka të qartë se çfarë ndodh në ngrehinën shtet. Po e përjetojnë edhe më shumë këtë kohë ku për shkak edhe të pandemisë ka dalë mbi sipërfaqe gjithë ai llum që ziente prej kohësh.
Qindra milionë euro janë hedhur për konçesionet në shëndetësi, por shërbimi nuk ka ndryshuar. Mitmarrja gjithashtu është rritur frikshëm ku përveç mjekëve të partisë që mbulojnë pazaret me tesërën e Rilindjes, po ngjyejnë gishtat deri tek pastrueset apo infermieret.
Shërbimi mungon, por para e madhe është hedhur. Në këtë fushatë Rama po premton atë që nuk e bëri për tetë vite, jo se i mungoi koha, por ky është koncepti i qeverisjes, duke lënë pas një shëndetësi të sëmurë deri në gjenezë me izmin e vetë pushtetit, që oazin e sistemit shëndetësor e pa si mënyrën më të mirë për të futur konceptin shkatërrimtar të konçesioneve.
Ndërsa në Fier sapo ka dalë në spiërfaqe karabinaja e spitalit qyl, Rama e ka si “teqenë” ku falet disa herë në muaj e madje do ta intesifikojë më shumë këtë ritual prej jeniçeri, që me gjuhën e propagandës dhe shpesh të shpatës po tenton ti presë “gjuhën” kritikëve që kanë kaluar mbi kurriz sistemin tonë shëndetësor.
Nga ai “spital teneqe” Rama po premton një reformë të thellë ku sipas tij nuk do të ketë më mjekë, infermierë apo deri edhe pastruese që bëjnë pazar me jetët e qytetarëve. Premton edhe koncept tjetër në shëndetësi, a thua se nuk i dolën tetë vite për ta reformuar. Këto premtime badihava mund ti kthehen në boomerang, pasi sa herë përmendet fjala shëndetësi bilancet e tij janë të frikshme. Për vitin 2020 Janë rreth 6000 vdekje më shumë krahasuar me vitin 2019 dhe kjo ka një arsye të frikshme që pandemia po menaxhohet në mënyrën më të keqe të mundshme.
Ata të vdekur më shumë nuk janë vetëm statistikë votash për qeverinë, por dhimbje që ka prekur çdo familje e cila në pamundësi finaciare për ti dërguar të afërmit për kurim jashtë vendit u bënë dëshmitarë sesi lanë jetën në dyart e spitaleve, apo akoma më rëndë pa pasur mundësinë të marrin trajtimin e duhur shëndetësor.
