Nga Boldnews.al
Një njoftim promocional i “Tirana Bank” për sponsorizimin e projektit “Tarracat e Gjelbra” të Erion Veliajt, ngre pikëpyetje të forta mbi destinancionin final të mbi 500 milionë lekë të vjetra me TVSH, të tenderuara nga Bashkia e Tiranës
Banka, njoftoi së fundmi se “inauguroi projektin më të fundit “Tarracat e Gjelbra”…në bashkëpunim të suksesshëm me Bashkinë e Tiranës, në një aktivitet ku ishin të pranishëm Drejtori i Përgjjithshëm Ekzekutiv i Tirana Bank, Dritan Mustafa dhe Nënkryetarja e Bashkisë së Tiranës, Anuela Ristani.
Projekti “Tarracat e Gjelbra” synonte mbulimin e pjesës së sipërmve të stacionëve të autobusëve urbanë me bimësi.
Por, njoftimi i “Tirana Bank” zbulon, ndoshta pa dashje, një situatë që mund të përbëjë skandal financiar për bashkinë e drejtuar nga Erion Veliaj.
Projekti “Tarracat e Gjelbra” ishte pjesë e një tenderi me vlerë rreth 460 milionë lekë të vjetra pa TVSH, i shpallur në Qershor 2020, me objekt “Rikonstruksion i lulishteve dhe mikrohapësirave të gjelbra me shatërvane në blloqe banimi”.
Sipas dokumentave zyrtare, ky tender financohej nga të ardhurat e Bashkisë së Tiranës.
“Boldnews.al” ka raportuar më herët për këtë tender, ku përmendej fakti se Bashkia e Tiranës, pasi betonizoi pjesën më të madhe të qytetit, vendosi të lulëzojë tarracat e këndeve plastike në stacionet e autobusëve urbanë.
Tenderi është mbyllur në Gusht 2020 dhe fitues është shpallur bashkimi i operatorëve “Alentre” dhe “Shansi Invest”, të cilët kanë paraqitur një ofertë me vlerë shumë të afërt me fondin limit, rreth 455 milionë lekë të vjetra pa TVSH ose 540 milionë lekë të vjetra bashkë me TVSH.
Ku përfunduan paratë e tenderit?
Pra, Bashkia Tiranë ka realizuar tenderin, ka shpallur fituesit të cilët do të realizonin, ndër të tjera edhe “Tarracat e Gjelbra”.
Por, “Tarracat e Gjelbra” në stacionet e autobusëve janë kryer me sponsorizimin, pra me fondet, e “Tirana Bank”.
Atëherë, pikëpyetja kryesore është se ku përfunduan fondet që Erion Veliaj dhe stafi i tij ia kanë kontraktuar bashkimit të operatorëve “Alentre & Shansi Invest”.
Përgjigja e kësaj pyetjeje mund të përfshijë aludime të shumta, ndërkohë që nga Bashkia e Tiranës nuk ka asnjë njoftim që fondi i prokuroruar për “Tarracat e Gjelbra” të jetë rikthyer sërish në llogaritë e saj.
Dokumentat e tenderit dhe fotot e njoftimit promocional të “Tirana Bank” dëshmojnë se projekti i sponsorizuar nga Samir Mane është i njëjti me atë që Veliaj ka shpallur tender.
Faktet flasin vetë.
Në dokumentat e tenderit të Bashkisë së Tiranës, gjenden fotot më poshtë, ku dallohet qartë se institucioni parashikonte shpenzimin e parave publike për vendosjen e bimësisë mbi kabinat e stacioneve të autobusëve urbanë.
Ndërkohë, “Tirana Bank”, njoftimin e saj për sponsorizimin e projektit “Tarracat e Gjelbra”, e shoqëron me foto nga aktiviteti i inagurimit, ku dallohet qartësisht se biznesi i Samir Manes ka shpenzuar nga paratë e tij për vendosjen e bimëve mbi kabinat e stacionëve të autobusëve.
Ka një detaj “interesant” në të gjithë këtë histori.
Në faqen zyrtare të Agjencisë së Prokurimit Publik, tashmë nuk gjendet më asnjë gjurmë për këtë tender, të zhvilluar nga Drejtoria e Përgjithshme e Pastrimit dhe Gjelbërimit, një strukturë në varësi të Erion Veliajt.
Të gjithë të dhënat mund të sigurohen vetëm pas hulumtimit të Buletinëve të Prokurimit Publik, të cilët, fatmirësisht, janë të aksesueshëm dhe të patjetërsueshëm.
