Kryeministri Edi Rama ka personalizuar procesin e vaksinimit, ndërsa nga një proces shëndetësor me qëllim mbrojtjen e qytetarëve nga pandemia e Covid-19, e ka kthyer në një show dhe propogandë, madje duke e përdorur edhe si një armë elektorale për zgjedhjet e 25 prillit.
Kulmi ka arritur kur vaksinimi nuk nis nëse Edi Rama nuk shkon në një prej qendrave të caktuara. Kjo ndodhi në Tiranë, në nisjen e procesit, në Shkodër, ndërsa në Vlorë procesi u shty me 48 orë, pasi Kryeministri nuk mund të shkonte në orën e caktuar për nisjen e vaksinimit të stafeve mjekësore, për shkak se ndodhej në Shkodër.
Edhe sot në stadiumin “Air Albania” personaliteteve mbi 80 vjeç, pritën derisa Edi Rama u shfaq në qendrat e ngritura për vaksinim.
Personalitete të artit, kulturës apo ish-politikanë që kanë mbajtur poste drejtuese, janë lënë në pritje të mbërritjes së Kryeministrit, i cili më parë ishte në Elbasan, në kuadrin e takimeve me qytetarë për zgjedhjet e 25 prillit.
E ndërsa në ditën e parë të procesit të vaksinimit mund të justifikohej me faktin se ai si një lypsar kishte siguruar disa doza vaksinash, ajo që po vihet re në këtë proces është fakti se po mos jetë Kryeministri vaksinimet edhe mund të ndalojnë. Dhe sot nuk kishte si të mos shfaqej sërisht si protagonist, veçanërisht kur ishin në proces vaksinimi emra të njohur, që Kryeministri i cilëson si personalitete.
Batutat me Moisiun
Rama-Moisiut: Gjigant si je mirë?
Moisiu: Mirë!
Rama: Do të ulesh pak se është procesi.
Manastirliu: Kjo është salla ku bëhet vaksina, që monitorohet nga mjekët dhe urgjenca kombëtare për çdo problem.
Në daljen e tij për media pas vizitës në qendrën e vaksinimit Rama bëri me dije se ditën e sotme nuk ishin vetëm personalitete që morën vaksinën por edhe të moshuar të tjerë mbi 80-vjeç të rekomanuar nga mjeku i familjes.
