Kryeministri Edi Rama po kërkon mandatin e 3-të në zgjedhjet e 25 prillit, por gjithçka e lidh dhe e krahason me 8 vite më parë, vitin 2013, kur ai mori qeverisjen e vendit.
Pas 8 vitesh në pushtet, Rama vijon të bëjë krahasime me qeverisjen e PD-së, por jo me premtimet që ai vetë ka bërë dhe nuk i ka mbajtur.
Sot Ramës i mungon një bilanc mes premtimeve të realizuara dhe atyre të pambajtura, ose më saktë ka një bilanc negativ, pasi shumë prej tyre kanë mbetur thjesht në letër.
E vetmja gjë që duket se i ka mbetur është të krahasojë pamje bardh e zi dhe me ngjyra, duke tentuar të tregojë ndryshimin mes asaj që ka gjetur dhe asaj që ka bërë. Dhe këtu, si piktor që është, mendon se fasadat janë gjithçka, megjithëse çdo ditë raportohen humbje jetësh njerëzore, në shifra të frikshme, lidhur me numrin e popullsisë.
Rama thotë se ndryshimi i spitaleve gjatë qeverisjes së tij është më shumë se i dukshëm, por sipas tij kjo nuk mjafton. Për të çuar deri në fund planet e tij, edhe pse ka në qeveri 8 vite, Rama kërkon mandatin e tretë, në mënyrë që shëndetësia falas që premtoi, të mund të bëhet sadopak realitet.
Në fakt pandemia e Covid-19 nxorri zbuluar të gjithë propogandën dhe show e Ramës me shëndetësinë, përfshi këtu edhe PPP për check up. Sot askush nuk e di se sa është shifra reale e personave të prekur nga Covid-19, por ajo që dihet është se numri i atyre që sot kurohen në banesa në gjendje të rënduar është shumë herë më i lartë se ato që arrijnë të shtrohen në spitale. Dhe për këtë ka një arsye: mungesa e besimit apo kushtet spitalore të rënduara, për të cilat Rama mburret.
Çdo ditë sot denoncohen raste të asaj që ndodh në spitale, madje denoncimin më të fundit e ka bërë një mjek, sipas të cilit babai i tij, edhe ai një ndvr mjekët më të njohur në vend, që humbi jetën nga Covid, iu refuzua trajtimi në spitalin Infektiv. Ky është bilanci që Kryeministri duhet të paraqesë, ndërsa për pothuajse njëvit trumpeton se Covid-19 në Shqipëri po menaxhohet më mirë se në Itali, Gjermani apo shumë vende të tjera të BE.
Postimi i Ramës:
Po sikur të kishte sulmuar virusi para 7 vjetësh kur spitalet ishin deri edhe në këtë derexhe apo sikur largoqoftë edhe ne të kishim qenë si ata të para 7 vjetëve dhe të na kishte gjetur me ato farë spitalesh, a e imagjinoni dot se çfarë qameti do ishte bërë apo jo?
Ky është Spitali i Urgjencës dhe Patologjisë në Elbasan dhe besoj s’ka nevojë për koment, pavarësisht se kush nuk do të shikojë s’ka shans ta shohë ndryshimin (s’ka më qorr se ai që i ka sytë top, po mëndjen tapë!), por do të vazhdojë avazin se sot është më keq se dje!
Jo, sot spitalet nuk kanë asnjë krahasim me dje, por unë jam i pari që e di se ky ndryshim fantastik i infrastrukturës nuk mjafton, sepse duhet ta kryejmë deri në fund edhe ndryshimin që kemi nisur këto vite në organizimin e bluzave të bardha, menaxhimin e tyre, cilësinë morale e jo vetëm profesionale të shërbimit, duke pastruar deri në fund abuzuesit e batakçinjtë nga radhët e atyre bluzave! Prandaj na duhet Mandati i Tretë.
