Nga Boldnews.al
Erion Veliaj ka mbyllur tenderin për pastrimin e tre nga katër zonat e Tiranës, nëpërmjet një procedure ku dallohet qartë se ka ekzistuar një konkurencë thuajse “fiktive” ndërmjet operatorëve ekonomikë.
Pjesën më të madhe të fondit prej 27 miliardë lekësh të vjetra pa TVSH, e ka fituar kompania “Fusha” shpk.
Ajo është shpallur fituese në lotin e katërt të tenderit, me objekt “Shërbimi i Pastrimit të Zonës Tirana IV”.
Për këtë lot, Bashkia e Tiranës kishte vendosur si fond limit shumë prej 906 milionë lekë të reja pa TVSH.
Bazuar në dokumentat zyrtare, rezulton se në këtë lot të tenderit kanë marrë pjesë 4 kompani- “Kevin Konstruksion”, “Pastrime Silvio”, “Korsel” dhe “Fusha” shpk.
Bashkia e Tiranës ka skualifikuar “Kevin Konstruksion” dhe “Pastrive Silvio”, pasi ato nuk kanë paraqitur ofertë ekonomike, duke krijuar dyshimet se janë përfshirë fiktivisht në tender, për të krijuar idenë e garës.
Në përfundim, Bashkia e Tiranës ka shpallur fitues të lotit IV kompaninë “Fusha” shpk, e cila ka paraqitur ofertën ekonomike me vlerë 861 milionë lekë të reja, ndërkohë që “Korsel” kishte dhënë një ofertë më të lartë (891 milionë lekë të reja).
Por, ndërkohë që “Korsel” humbi në këtë lot, ajo u shpall fituese përballë “Fusha” shpk në një tjetër lot të këtij tenderi, atij për “Shërbimin e Pastrimit të Zonës Tirana II”, me fond limit rreth 34 milionë lekë të reja.
Ndërsa loti i parë i tenderit, i emërtuar “Shërbimi pastrimi për Zonën I Tiranë”, me fond limit rreth 560 milionë lekë të reja pa TVSH, u fitua nga kompania “Ante-Group”.
Përballë saj në këtë garë ishin sërish “Kevin Konstruksion” dhe “Pastrime Silvio”, të cilët kanë paraqitur ofertë ekonomike zero. Pra, praktikisht, ishin të skualifikuara që në momentin që kanë shënuar emrin për t’u përfshirë në këtë tender.
Rrjedhimisht, “Ante-group”, kompania e vetme që kishte paraqitur ofertë ekonomike në shumën 553 milionë lekë të reja pa TVSH, u shpall edhe fituese e këtij loti.
Pra, praktikisht, 3 kompani që kanë dhënë oferta ekonomike, janë fituese të tre loteve të tenderit, të përfunduar deri më tani për pastrimin e qytetit të Tiranës.
Ndërkohë, pritet që të shpallet edhe fituesi i lotit me objekt “Shërbimi pastrimi Zona II, Tiranë”, me fond limit 772 milionë lekë të reja pa TVSH.
