Dje ishte njoftuar zyrtarisht se nga dita e sotme do të niste vaksinimi i bluzave të bardha dhe stafeve mjekësore në Shkodër dhe në Vlorë.
E ndërsa në Shkodër ka shkuar Kryeministri Edi Rama dhe ministrja e Shëndetësisë, Ogerta Manastirliu, ndërsa si qendër vaksinimi është zgjedhur pallati i sportit, në Vlorë procesi është shtyrë për të nisur të enjten.
Sipas kreut të operatorit të kujdesit shëndetësor vaksinimi do të kryhet të enjten, për shkak se sot ka nisur trajnimi i stafit mjekësor. Arsyeja që jepet për shtyrjen e vaksinimit duket e pabesueshme, kjo për faktin se prej javësh Ministria e Shëndetësisë deklaron se kanë nisur trajnimet e stafeve që do të merren me procesin, madje është thënë se gjithçka është gati.
Dje ishte njoftuar se në Vlorë do të dërgoheshin 1500 doza vaksinash Pfizer. Nuk dihet nëse dozat janë nisur ose jo, por shtyrja e procesit tregon se gjithçka po bëhet për show dhe propogandë. Ndoshta shtyrja me 48 orë e nisjes së vaksinimit në rajonin Jugor të vendit ka lidhje me faktin se procesi duhet të marrë bekimet e Edi Ramës, i cili shfaqjet herë si epidemiolog, herë si vaksinator dhe herë si gjeneral i luftës me “armikun e padukshëm”.
Sot Rama zgjodhi të shkojë në Shkodër, ndoshta po të shkonte në Vlorë vaksnimi do të niste atje dhe do të shtyhej në kryeqendrën e veriut.
