Gjykata Kushtetuese ka marrë në shqyrtim çështjen e kërkuar shoqata kombëtare “Pronësi me drejtësi” e cila kërkonte shfuqizimin e disa neneve në lidhje me pronat. Sipas asaj që njofton vetë Gjykata Kushtetuese, seanca plenare për këtë çështje është zhvilluar me 4 Shkurt.
Në përfundim të shqyrtimit, gjykata ka vendosur pranimin pjesërisht të kërkesës. Kjo për shkak se boshllëku ligjor i konstatuar nuk garanton shpërblimin e drejtë të së drejtës së pronës private dhe cenon parimin e sigurisë juridike dhe se nuk është respektuar standardi i parashikuar në Kushtetutë.
“Në përfundim të shqyrtimit, Gjykata, duke vlerësuar se boshllëku ligjor i konstatuar nuk garanton shpërblimin e drejtë të së drejtës së pronës private dhe cenon parimin e sigurisë juridike dhe se nuk është respektuar standardi i parashikuar në nenin 118 të Kushtetutës, njëzëri,
VENDOSI:
– Pranimin pjesërisht të kërkesës.
– Shfuqizimin, si të papajtueshëm me Kushtetutën, të nenit 7, pika 2, shkronjat “a” dhe “b”, të ligjit nr. 133/2015 “Për trajtimin e pronës dhe përfundimin e procesit të kompensimit të pronave”.
– Shfuqizimin, si të papajtueshëm me Kushtetutën, të pikave 16/2, 16/4 dhe 18 të VKM-së nr. 223, datë 23.03.2016 “Për përcaktimin e rregullave dhe të procedurave për vlerësimin dhe shpërndarjen e fondit financiar e fizik për kompensimin e pronave”, të ndryshuar.
– Rrëzimin e kërkesës për kërkimet e tjera.
– Detyrimin e Kuvendit të Shqipërisë për të plotësuar ligjin nga data e shpalljes së vendimit të Gjykatës Kushtetuese deri në hyrjen në fuqi të tij.
– Ky vendim hyn në fuqi 6 muaj pas botimit në Fletoren Zyrtare”, thuhet në njoftimin e gjykatës.
Ndërkohë me 26 Janar, pas më shumë se 3 vitesh, Gjykata kushtetuese mori vendimin e parë, që ishte rrëzimi i kërkesës në lidhje me një padi për procedurën e Kodit Penal e ngritur nga disa Gjyqtarë të Tiranës.
