Nga Boldnews.al
Një dron propagande u ngrit nga Bashkia Tiranë për të treguar bardhësinë e dëborës, por duke e lidhur edhe me zemrat e kuqe të varura në Sahatin e Tiranës. Aq shumë i pëlqeu kjo pamje edhe kryeministrit sa e postoi në rrjetet e tij sociale. Por droni kishte bërë kujdes që të mos filmohej pjesa ku po ndërtohet një kullë e frikshme, që e eklipson përfundimisht emblemën e qytetit të Tiranës, Kullën e Sahatit.
Ka të rinj që “mahniten” nga gjetja e Lali Erit, që i vari Kullës së Sahatit disa tollumbace në formën e zemrave të kuqe, por vitin tjetër nuk kanë ç’të shohin më… Kulla e oligarkisë do të mbysë veprën kryesore të kryeqytetit. Sepse ky ishte vendimi i kryeministrit Edi Rama dhe i kryebashkiakut Erion Veliaj.
Ndërsa të rinjtë edhe pa e kuptuar festojnë Shën Valentinin (e ashtëquajtuara, festa e të dashuarve), oligarkia falenderon Shën Erionin, këtë personazh të dashuruar pas betonit, kullave të larta dhe pallateve shumëkatëshe. Për ta ai është shënjtori i betonit, i vendit ku është e lehtë pastrimi i parave, për më tepër që është një personazh që nuk pyet për ligj e moral politik e personal, duke futur nën dhe’ edhe ato pak objekte kulturore që i mbetën Tiranës.
Shën Kulla apo “Grataçela”, kryebashkiaku Erion Veliaj, për pak kohë mund të mbulojë me propagandë batërdinë e ndërtimeve, por ato janë të dikshme, shihen me sy, të vrasin pamjen, e të zenë frymën. Vetëm në një hapësirë të vogël ndodhen dy kulla. Njëra që mban firmën e Edi Ramës kur ishte kryebashkiak dhe tjetra të Erion Veliajt. Kulla tashmë e ndërtuar ka futur nën vete varrin monumental të Kapllan Pashës, (edhe ajo një vepër e trashëgimisë kulturore), e cila i shpëtoi edhe çmendurisë komuniste që shkatërroi çdo objekt kulti apo kulturor.
Tetarin Kombëtar e shembën me firmën e “Shën Kullës”, Lali Erit. Pikërisht në emër të zhvillimit që për të dhe kryeministrin ishin shtatë gataçela shumëkatëshe. Në pamundësi për t’i vendosur fadromën Sahatit të Tiranës, apo edhe Xhamisë së Et’hem Beut, krijuan një çmenduri tjetër, duke u ndërtuar një kullë të frikshme në rrëzë të themeleve të dy objekteve kulturore.
Për shkak të punimeve në ndërtimin e kullës së re, minarja e xhamisë së Ethem Beut pësoi një çarje serioze, por këtë “Lali Kulla” e mbulon me tollumbacet e Shën Valentinit. Aq sa bëri për vete në këtë ditë edhe kreun e qeverisë që më 14 shkurt u fut në profilin e lalit dhe i bëri shere videos që publikoi kreu i bashkisë.
Asnjë prej tyre nuk flet për rrugët e bllokuara ku mijëra qytetarë mbrëmjen e së shtunës mbetën të izoluar në çdo cep të vendit, ku në vend të borëpastruesve dhe kripës që duhet të hidhej në rrugë qeveria shpërndante propagandë, që ishte edhe më e frikshme se hedhat dhe stuhia e dobërës.
