Ndryshim në kreun e Serie A. Humbja në Spezia ka ndikuar që Milani të heqë dorë pas një kohe të gjatë nga kryesimi i kampionatit italian të futbollit. Aty është ngjitur Interi i Antonio Contes pas suksesit 3-1 në “San Siro” kundër Lazios.
Fitorja e tretë radhazi në kampionat për zikaltrit dhe vendi i parë me 50 pikë, një pikë më shumë se kushërinjtë kuqezi. Një penallti solli zhbllokimin e takimit në mesin e pjesës së parë. Romelu Lukaku nuk gaboi dhe vendasit në avantazh.
Sulmuesi belg realizoi një tjetër gol në minutat e fundit të fraksionit të parë të sfidës, duke u ngjitur në shifrën e 300 golave zyrtarë në karrierë. Një arritje super për 27-vjeçarin, i cili mbërrin Cristiano Ronaldon në krye të golashënuesve të Serie A (nga 16 gola).
Lazio e nisi mirë pjesën e dytë dhe gjeti golin në 61′. Argjentinasi Escalante i ardhur nga stoli, devijoi drejt rrjetës një goditje dënimi të Milinkovic-Savic. Shpresat e Lazios për të mos dalë pa pikë morën fund tre minuta më vonë.
Kundërsulm perfekt i Interit, askush nuk ia del të ndalë Lukakun, i cili dhuron një asist për Lautaro Martinez. Sulmuesi argjentinas duhet vetëm të shtyjë topin drejt rrjetës, ashtu ndodh dhe 3-1 për Interin.
Simone Inzaghi hodhi në fushë Vedat Muriqin pesë minuta më vonë, por djemtë e Contes ia dolën të menaxhonin shumë mirë minutat e mbetura të ndeshjes, duke u rikthyer pas një kohe të gjatë në krye të Serie A. /abcnews.al
