Kryeministri Edi Rama ka vlerësuar sot paraardhësin e tij në krye të PS-së, Fatos Nano, pasi ky i fundit në një prej emisioneve televizive nuk nguroi të shprehte mbështetjen për Kreun aktual të Rilindjes.
Rama tha se ka një raport mjaft të mirë me Fatos Nanon, por shmangu pyetjen nëse ai do e mbështeste atë përsa i takon ëndrrës për postin e Presidentit.
Kryeministri tha se politikanët nuk janë njësoj, sikundër edhe peshqit nuk janë njësoj, ndërsa shtoi se ai personalisht nuk ka asnjë çmim.
“Unë si politikan nuk kam çmim, politikanët nuk janë të gjithë njësoj, sikundër nuk janë njësoj të gjithë peshqit”, tha Rama. Sipas tij, Nano është një aset, për të cilin ndjehet mirë që e ka.
“Nuk është Nano që afrohet, jam unë që i kërkoj këshilla. Nano nuk ka pasur një pasardhës me eksperiencë, ndërsa unë kam fat që e kam”, tha Rama, duke shtuar “se ish-Kryeministri ka qetësinë e duhur për të më dhënë këshilla dhe opinione, kur ia kërkoj”.
