“Fajin e ka Saliu”/ Berisha i përgjigjet Fatos Nanos, publikon videon ku e cilëson Ramën shitës ikonash të vjedhura

Ish-kryeministri Sali Berisha ka reaguar pas deklaratave të bëra dje nga Fatos Nano në emisionin “Opinion”.

Berisha ka zgjedhur të ironizojë Nanon përmes një postimi në rrjetet sociale, ku shkruan: “Miq, fajin e ka Saliu”, një shprehje kjo që përdorej nga Edi Rama kur ishte kryetar i opozitës.

Po ashtu Berisha ka publikuar në “FB” një video të vjetër ku Fatos Nano asokohe kryeministër sulmon Edi Ramën.

“Edi Rama ka një problem moral. E kam marrë me thonj të paprerë si refugjat nga Parisi dhe e kam sjellë të bëjë pjesë në ekipet tona qeverisëse. Unë mund të kem bërë shumë gjëra por e nxora nga bataku i fyerjeve, nga refugjat dhe shitës ikonash të vjedhura në kohën e Saliut, në ministër dhe kryetar të bashkisë më të madhe të Shqipërisë”, shprehet Nano në videon e nxjerrë nga arkivat.

LEXO EDHE  ‘Punojmë për të ushqyer familjen/ Gratë dhe vajzat prostitucion gjatë orës policore në Durrës

Në intervistën e djeshme, Fatos Nano e konsideroi rolin e Berishës në politikën shqiptare si konfliktual.

“Njeriu që ka ngulur konfliktin që edhe sot e kësaj dite nuk po largohet dot në politikën shqiptare është Sli Berisha. Dhe di vetëm mënyra konfliktuale për të realizuar ambiciet e veta. Është e pamundur të kesh një proces paqësor të shtrirë në kohë për të arritur synime të mëdha me kostot më të ulëta me Sali Berishën”, tha Nano.

“Berisha u mor personalisht me burgosjen time, në 21 Janar pushoi së qeni politikan”, tha ndër të tjera Nano, që përdori tone të zbutura në raport me kryeministrin Rama, duke i kursyer kritikat.