Jorida Tabaku, ish-deputete e PD, akuzon Kryeministrin Edi Rama se mashtroi shqiptarët me rritjen ekonomike imagjinare, ndërsa fton shqiptarët që me 25 prill ta ndëshkojnë me votë Rilindjen.
Duke reaguar ndaj deklaratave të Kryeministrit Rama lidhur me renditjen e Shqipërisë përsa i takon indeksit të demokracisë në vend, Tabaku shprehet se ato janë thjesht një shaka e hidhur.
“Shqiptarët e vuajnë përditë nën lëkurë diktatin e tij dhe mungesën e demokracisë.
Rënia ekonomike e Shqipërisë është 7.5% dhe të gjithë institucionet ndërkombëtare flasin qartë dhe thonë që Rama ka qenë i paaftë, ka dështuar për ta menaxhuar krizën e pandemisë por njëkohësisht edhe tërmetin.
Ai nuk diti që të përballet me krizat e njëpasnjëshme që kaloi vendi, ka dështuar dhe po dështon çdo ditë e më shumë. Ndaj nuk i ka mbetur vetëm se të gënjejë publikisht edhe për fakte që janë publike.
Kryeministri në ikje i Shqipërisë, në mungesë të një oferte reale për shqiptarët por njëkohësisht si pengesa e vetme për demokracinë në vend, u krenua sot për një raport të “The Economist” mbi lirinë dhe demokracinë në vendin tonë.
Ai do të na shesë ne sikur në Shqipëri jemi më demokratikë megjithëse në 8 vite të rilindjes së tij vendi ka pasur një rënie të të gjithë treguesve që kanë lidhje me demokracinë dhe lirinë e individëve”, shprehet Tabaku.
Sipas saj, Shqipëria nën qeverisjen e Edi Ramës u zhvendos nga grupi i vendeve me demokraci hibride në grupin e vendeve me demokraci të lëkundur.
Referuar marrëveshjes së 5 qershorit, Tabaku tha se atë Rama e ka prishur, e ka shkelur me dy këmbë dhe sigurisht nuk i ka sjellë asnjë përmirësim në asnjë tregues të demokracisë.
“Marrëveshja e 5 Qershorit u prish në kurriz të Demokracisë dhe Lirisë së qytetarëve për të zgjedhur një qeveri demokratike që punon për qytetarët dhe beson tek liria.
E vërteta është se janë 5 shtylla kryesore dhe 60 tregues që ka matur “The Economist”, ndërkohë që në të gjithë treguesit ka pasur rënie, në të vetmen pikë, në miratimin e këtij ligji ka pasur përparim”, tha Tabaku.
