Ajo që ndoshta ishte planifikuar si një ditë e zakonshme punë për një 61-vjeçare dhe një kohë kënaqësie për 29-vjeçar, është kthyer në një skenar krejt tjetër falë policisë.
Burime zyrtare nga blutë e kryeqytetit bënë me dije se janë arrestuar dy persona për veprat penale “Prostitucioni” dhe “Shfrytëzimi i prostitucionit”. Më konkretisht, efektivët e Hetimit të Trafiqeve të Paligjshme në Drejtorinë Vendore të Policisë së Tiranës kanë vënë në pranga 61-vjeçaren me iniciale N.P., banuese në Fier dhe 29-vjeçarin me iniciale O.B., banues në Tiranë.
Sipas të njëjtave burime, në ambientet e një hoteli në bulevardin “Zogu i Parë” (në zonën e njohur si “Treni” në Tiranë) “shtetasja N.P. është kapur në flagrancë duke kryer marrëdhënie seksuale me shtetasin O.B., kundrejt shpërblimit”.
Burime policore thanë se efektivët kanë pasur informacion lidhur me veprimtarinë që do të kryenin dy personat dhe kanë organizuar punën për të realizuar arrestimin e tyre në flagrancë.
