Ndërsa nuk ka asnjë rekomandim zyrtar për vendosjen e dy maskave, ose për vendosjen e dy shtresave njëra mbi tjetrën, tha Dr. Anthony Fauci, mund të jetë diçka e mirë për t’u bërë, raporton CNN.
“Nuk ka asnjë rekomandim, megjithatë ka shumë njerëz që bëjnë kështu,” tha drejtori i Institutit Kombëtar të Alergjisë dhe Sëmundjeve Infektive gjatë një konferencë për shtyp të Shtëpisë së Bardhë. “Nëse mendoni se mund të jeni më të sigurt me më shumë se një pengesë fizike do të ishte më mirë, nuk ka asnjë problem me njerëzit që vendosin dy maska”, tha Fauci duke shtuar se ai shpesh mban dy maska.
Dr. Rochelle Walensky, drejtori i Qendrave Amerikane për Kontrollin dhe Parandalimin e Sëmundjeve, tha që CDC po vlerëson shkencën aktualisht dhe po rishikon rekomandimet e saj mbi maskimin e dyfishtë bazuar në shkencën më të fundit.
Deri tani, studimet kanë treguar se mbajtja e një maske me një shtresë nuk është shumë efektive. Edhe maskat prej pëlhure me dy dhe tre shtresa janë vetëm pjesërisht mbrojtëse, diku në 50% deri 60%.
Një studim i vitit 2020 zbuloi se maskat kirurgjikale janë rreth 50% të efektshme në mbrojtjen e përdoruesit dhe rreth 60% në 70% në mbrojtjen e të tjerëve. Por nëse vendosni një maskë kirurgjikale nën maskën prej pëlhure, ekspertët besojnë se është më shumë se 90% efektive.
