Ministria e Drejtësisë ka dorëzuar një kërkesë për ekstradim të ish-zv.kryeministrit Arben Ahmetaj nga Zvicra.
Ky fakt u bë me dije gjatë relatimit të fakteve ne procesin në themel për dosjen “Buka” ku u vendos të vijojë procesi në mungese për ish-nr 2 të qeverisë.
Avokati i Ahmetajt, Henrik Ligori, bëri të ditur se për klientin e tij nuk ka asnjë masë sigurie në këtë çështje dhe se masa e propozuar lidhet me një procedim tjetër.
Ahmetaj ndodhet në arrati që prej korrikut 2023 dhe raportohet se po strehohet në Zvicër. SPAK e akuzon atë për “shpërdorim detyre”, sipas nenit 248 të Kodit Penal, me dyshimin se i ka shkaktuar shtetit shqiptar një dëm prej 7 miliardë lekësh.
Për çështjen e inceneratorëve, ndaj ish-zëvendëskryeministrit rëndojnë gjithashtu akuzat për pastrim parash dhe fshehje pasurie. Hetimet për këtë dosje pritet të përfundojnë më 23 shtator.
