Ekipi i Organizatës Botërore të Shëndetësisë në Wuhan, i cili po heton origjinën e Covid-19 thonë se ata po marrin të dhëna “të cilat askush nuk i ka parë më parë” dhe “po arrijnë diku”.
Ata gjithashtu nuk kanë përjashtuar mundësinë që virusi të ketë dalë nga një laborator.
Dr Peter Daszak, pjesë e misionit të vazhdueshëm të OBSH-së, i tha Sky News:
“Kemi marrë informacione të reja dhe janë gjëra shumë të vlefshme që kanë filluar të na ndihmojnë të shohim drejtimet e duhura për këtë virus.”
Në intervistën e tij të parë me një transmetues britanik që kur mbërriti në Kinë, Dr Daszak, tha se po mblidhnin informacion të vlefshëm nga vizitat në vend, veçanërisht tregun e prodhimeve të detit Huanan, ku u raportuan rastet e para të Covid- 19.
“Ne jemi në treg duke kërkuar përreth vetvetiu dhe duke bërë pyetje, ne po takohemi me menaxherë të tregut, me shitës që kanë punuar atje dhe njerëz nga komuniteti dhe duke u bërë atyre pyetje.
“Po flasim me njerëz që mblodhën mostra nga dyshemeja e tregut që më pas rezultuan pozitiv.”
Misioni i OBSH-së mbërriti në Wuhan më shumë se një vit pasi filloi shpërthimi atje, pasi organizata u ankua për vonesa në hyrje. Por shkencëtarët kinezë kanë kryer ndërkohë hulumtimet e tyre për origjinën e Covid-19.
“Ata po ndajnë të dhëna me ne që nuk i kemi parë më parë, që askush nuk i ka parë më parë. Ata po flasin me ne hapur për çdo rrugë të mundshme. Ne vërtet po arrijmë diku dhe mendoj se çdo anëtar i ekipit do ta thoshte këtë”, u shpreh Dr Peter Daszak.
