Anëtari i Komisionit të Ankesave dhe Sanksioneve në KQZ, Ledio Braho, tha mbrëmjen e sotme në emisionin “Open” se nuk ka garanci lidhur me votat e emigrantëve.
Gjatë debatit me ministrin e Diasporës, Pandeli Majko, i cili i bëri thirrje KQZ që të zbatojë ligjin përsa i takon votimit të emigrantëve, Braho tha se ministri nuk mund të bëjë sikur vjen nga Zvicra, pasi ka 30 vjet në politikë, dhe nga eksperiencat e deritanishme në Shqipëri janë vjedhur votat.
“Ne z. Majko na janë vjedhur votat në Tiranë dhe jo më me postë. Votimi me postë nuk i garanton të drejtat që përcakton Kodi Zgjedhor. Vota me postë? E para është që nuk dihet personi që do të fusë votat në zarf. Së dyti sa shqiptarë kemi jashtë dhe ku janë? Ne nuk e dimë ende. Ligji është miratuar në 2016 dhe nuk mund të thuhet sot që fajin e ka opozita.
Ne nuk mundet të përcaktojmë rregullat pa e ditur se ku janë shqiptarët. Nëse sot do të kishim të regjistruar 1.2 mln zgjedhës nuk do të kishte opozitë në Botë që do të pengonte procesin”, tha Braho.
Ministri për Diasporën, Pandeli Majko, ka mbrojtur idenë se Kodi Zgjedhor përcakton të drejtat e emigrantëve për të votuar, por Braho i tha se e drejta e votës është një e drejtë Kushtetuese.