Deputeti socialist Alket Hyseni tha mbrëmjen e sotme në emisionin Open se kandidatët për deputet mbajnë përgjegjësi ligjore lidhur me të shkuarën e tyre.
Hyseni, referuar kërkesave të vazhdueshme të Ambasadores amerikane Yuri Kim, për të kandiduar emra të pastër në zgjedhjet e 25 prillit, tha se nuk është përgjegjësia e partive politike për të verifikuar kandidatët, por e institucioneve.
Hyseni tha se ligji për dekriminalizimin ndalon të kandidohen kriminelët apo personat e dënuar. “Nëse s’do kishte ndalime ligjore atëherë do të bëheshin kalkulime elektorale, jo vetëm nga Edi Rama, por edhe nga Lulzim Basha apo Monika Kryemadhi. Tashmë kemi një ligj që i ndalon kandidimin”, tha Hyseni.
“Ka ikur koha e partisë shtet, janë institucionet që verifikojnë. Ne e kemi në statut këtë, por mund tju them se shumë shqiptarë kanë ikur jashtë, askush nuk i ndalon dot që të kandidojnë, por shteti shqiptar s’ka rekorde për ta, pra nuk e dinë të shkuarën e tyre. Në kushte të tilla është përgjegjësi e atyre që plotësojnë formularët e deklarimeve”, tha Hyseni.
Sipas tij, Kryeministri Edi Rama me deklaratën e tij, tregoi se respekton shtetin, respekton institucionet.
“Ne s’jemi parti shtet, por jemi parti në pushtet”, tha Hyseni.
Por në debat me deputetin e PS, Endri Shabani nga Nisma Thurrje, tha se Kryeministri nuk mund të flasë me një gjuhë arrogance, pasi ai i ka mundësitë përmes strukturave shtetërore që të verifikojë çdo kandidat.
“Fatkeqësisht jeni parti shtet dhe Kryeministri kontrollon çdo institucion, ndaj dhe nuk mund të thotë se nuk ka përgjegjësi partia, por individi”, tha Shabani.
