Ish-ministri i Drejtësisë, Ylli Manjani, ka reaguar ashpër në rrjetet sociale, ndaj Kryeministrit Edi Rama, i cili një ditë më parë nga Korça shtoi dozat e akuzave ndaj BE-së, ndërsa foli për tregjet alternative si Turqia apo Lindja e Mesme.
Manjani shkruan se Edi Ramaka të drejtë të zgjedhë miqtë e miqsitë e tij e së familjes së tij ku të dojë, në lindje e më përtej, të bëjë vaksinë, të hajë hallvë, pilaf e byftek sa të dojë në lindje, po të dojë të bëhet edhe synet, por ai s´ka asnjë të drejtë të largojë vendin nga rruga perëndimore.
Postimi nga Ylli Manjani
Edi Rama ka të drejtë të zgjedhë miqtë e miqsitë e tij e së familjes së tij ku të dojë. Në lindje e më përtej. Të bëjë vaksinë, të hajë hallvë, pilaf e byftek sa të dojë në lindje. Po të dojë të bëhet edhe synet. Është zgjedhje e Tij.
Por ai nuk ka asnjë të drejtë që në emrin tim dhe të çdokujt tjetër që mendon njësoj, të shajë perëndimin e të largojë vendin nga rruga perëndimore.
Europa është shtëpia jonë gjeografike, ekonomike dhe sociale. Duhet ta bëjmë sa më shpejt edhe shtëpi politike dhe demokratike.
Kjo është sfida. Kushdo që merr përsipër të largojë Shqipërinë nga rruga e Europës, konsumon akt të lartë tradhëtie.
As Skënderbeu nuk e bëri këtë gjë, meqë i pëlqen të krahasohet me të. Nuk ka edhe me Skënderbeun edhe me Sulltanin.
