Kreu demokrat, Lulzim Basha, e cilësoi programin e paraqitur nga Partia Demokratike, jo si një program mrekullish, por që do të normalizojë dhe rimëkëmbë ekonominë.
Gjatë bashkëbisedimit me shoqatën e fasonëve, Basha tha se ky sektor është një nga më të rëndësishmit e ekonomisë, pasi punëson një numër të madh personash.
“Mbi 15 mijë veta kanë humbur vendin e punës vetëm në sektorin tuaj”, tha Basha, ndërsa akuzoi Qeverinë Rama për mungesën e mbvshtetjes në kohë pandemie jo vetëm ndaj bizneseve, por edhe qytetarëve.
Referuar programit të prezantuar nga PD, Basha tha se aplikimi i taksës së sheshtë 9% është ulje e madhe e barrës fiskale.
Ai tha se çdo litër naftë do të jetë 240 lekë më lirë, pasi qeveria e drejtuar nga PD do të heqë taksën Rama. Kreu demokrat gjithashtu u ndal te rimbursimi i TVSH, për të cilën u shpreh se nën qeverisjen e Ramës është kthyer në një makth.
Basha tha se qeveria e re në fillim, me masat që do të aplikojë, do të stabilizojë ekonominë dhe më pas nis rimëkëmbja e saj.
“Në fillim stabilizimi, pastaj rimëkëmbja e industrisë në tërësi”, tha Basha. Sipas tij, plani po sulmohet nga ata që nuk bënë asgjë
“Sulmet e tyre janë çertifikata e dështimit të tyre 8 vjeçar”, tha Basha. Sipas tij, shqiptarët kërkojnë ndryshimin më 25 prill, ndërsa theksoi se aktualisht 7 në 10 shqiptarë duan të ikin sepse kjo qeveri për 8 vite me rradhë i gënjeu.
“Gjëja e parë është të ndalim largimin e forcës punëtore apo paaftësinë tuaj për të vazhduar për të mbajtur forcën punëtore për shkak të gjithë problematikave që diskutuam deri tani.
E dyta dhe që është po kaq e rëndësishme është rimëkëmbja e industrisë në tërësi. Dhe ne besojmë që me masat që kemi prezantuar, jo vetëm për sektorin tuaj, por edhe me masat specifike për sektorin tuaj rimëkëmbja e industrisë së fasonëve në Shqipëri është plotësisht e mundur brenda 12-18 muajve të parë.
Kjo kohë nuk ka pse të humbet, por gjatë kësaj kohe ne mund të ndërtojmë së bashku vizionin jo thjesht për të mbajtur por për të zgjeruar dhe kapur tregjet e reja që mund dhe do të na ofrohen me lëshimet që po ndodhin si rezultat i ndryshimit të zinxhirit të furnizimit të Europës Perëndimore që është dhe tregu kryesor i fasonëve shqiptarë.
Pra, të treja këto objektiva janë të gërshetuara. Stabilizim, rimëkëmbje dhe pastaj zgjerim në bazë të një vizioni të përbashkët.
Nga shpalosja e planit, plani po sulmohet, po sulmohet nga ata që nuk bënë asgjë, po sulmohet për një arsye të thjeshtë. Njësoj si ju edhe sektorët e tjerë të ekonomisë edhe shqiptari më i thjeshtë duan ndryshim dhe ky plan është ndryshimi që ata dështuan ta sjellin për 8 vite me rrallë”, tha Basha.
Ai tha se nuk ka ndërmend të harxhojë as një sekond kohë me sulmet e tyre, pasi sulmet e tyre janë çertifikata e dështimit të tyre 8 vjeçar.
