Shqiptari 27-vjeçar, i cili dyshohet se 5 ditë më parë vrau në Patra, Mario Metajn, është dorëzuar në polici. Mediat greke raportojnë se shqiptari në prani të avokatit të tij u paraqit në polici ku tashmë nis përballja me drejtësinë.
Ndërkohë që dje u lirua nga gjykata shoku i shqiptarit që u dorëzua. 31-vjeçari u akuzua për nxitje dhe bashkëpunim në vrasje, por avokati i tij tha se ai ishte qëlluar 15 herë me kaçavidë nga viktima dhe vëllai i tij.
Palët e përfshira në konflikt nuk kishin precedent dhe shkak i sherrit dyshohet një përplasje e mëparshme, që përfundoi në vrasje.
Tempo24.news raportoi 5 ditë më parë detaje nga krimi. Referuar dëshmitarëve në vendngjarje është mësuar se dy automjete që po shkonin drejt Patras, u përplasën në Kryqëzimin Kourtesis.
Pasagjerë nga të dy automjetet zbritën nga makina dhe befas u dëgjuan të shtëna armësh. Për pasojë mbeti i plagosur rëndë 27-vjeçari shqiptar i cili u rrëzua në trotuar i mbuluar në gjak.
Kalimtarët në vendngjarje nxituan të fshiheshin ndërsa banorët e pallateve në zonë mbyllën dritaret nga frika. I plagosuri është transportuar në spital në gjendje kritike për jetën.
Grupi hetimor po punon për zbardhjen e plotë të rrethanave të ngjarjes ndërkohë që dy persona janë shpallur në kërkim.
