Përgjimet e antimafies/ Rama: Ata që i ushqejnë po ia bëjnë nënën këtij vendi

Kryeministri Edi Rama ka reaguar lidhur me publikimin e disa përgjimeve të anti-mafies italiane, që zbulohet një skemë se si trajtohet Shqipëria si një vend ku mund të pastrohen paratë e mafies.

Rama u shpreh se nuk ka fakte dhe as prova në ato përgjime, lidhur me implikimin e zyrtarëve shqiptarë. Kryeministri zhvlerësoi totalisht përgjimet, ndërsa nuk kurseu akuzat në drejtim të opozitës dhe mediave, që sipas tij po ushqejnë të pavërtetat për publikun.

Ashtu sikundër pritej, Kryeministri ka mbajtur të njëjtat qëndrime si edhe në skandalet e mëparshme të publikuara, duke marrë rolin e prokurorëve, gjyqtarëve dhe hetuesve, me synim për ti vënë kapakun, çdo lloj hetimi apo verifikimi që mund të nisë nga Prokuroria.

“Merrini dhe pijini lëngun atyre materialeve. Ajo që mund të them janë konkluzionet e vetë prokurorëve të anti-mafies italiane.

Grupi hetimor italian ka dhënë një konkluzion. Ky është turp i pashembullt për mediat që ushqejnë tymnajën me llafe, muhabete, dëngla njerëzish.

LEXO EDHE  Takimi me sipërmarrësit, Basha: Çfarë përmirësohet me planin e PD për energjinë

Në konkluzion të prokurorisë italiane thuhet: pas më shumë se 1 viti udhëtimesh në Tiranë për investimet që do të bëheshin, ato dështuan totalisht dhe i vetmi investim që u bë ishte një dyqan i vogël veshjesh, për të cilin pati konflikt mes pronarëve.

Marrja e këtij llumi dhe servirja e këtij llumi si ushqim për shqiptarët, netëve të gjata të mejhaneve televizive dhe ditëve të gjata për klikime dhe spektakël është një turp, që i mishëron më së miri ata që ushqejnë këtë lloj qasje, që janë të njëjtët, që prirjen që t´ia bëjnë nënën këtij vendi e kanë prioritet”, tha Rama.

Sipas tij, e gjitha kjo është një tymnajë, një turp, për të kërkuar avantazhe në mexhelis, por po ia bëjnë nënën këtij vendi.

“S´kam çfarë të them, pasi e gjitha kjo është një tymnajë pa fakte”, tha Rama.