Nisma “Thurje” ka dorëzuar në pranë institucionit të SPAK-ut kallëzimin penal ndaj Erion Veliajt, për përgjimet e antimafias italiane.
Përfaqësuesi i “Thurjes”, Endri Shabani ka thënë se kjo është dosja e fundit që denoncojnë, ndërkohë që në mënyrë figurative kishin marrë edhe një palë dylbi “për të parë ujkun”.
“Sot Nisma Thurje provoi për herë të fundit t’i besojë drejtësisë së re. Duke marr shkas nga publikimi i disa audiopërgjimeve të një klani mafioz në Itali, mbi pazaret që bëhen për betonizimin e kryeqytetit. Në tavolinën ku ka tashmë 1000 zyrtarë të denoncuar për korrupsion e asnjë të dënuar ende, dorëzuam të 1001-tin. SPAK ka në dorë dosjen në të cilën qëndron brenda emri i kryebashkiakut të Tiranës, Erion Veliaj, duke shpresuar që edhe kjo dosje të mos vendoset në vendin e pluhërosjes së tyre. Kërkojmë që z.Veliaj të kalojë në sitën e vërtetë të drejtësisë, nëse ka gisht mbi marrëveshjet mafioze që bëhen në dëm të pronës publike dhe hapsirave për fëmijët tanë”, tha Shabani.
“Kërkojmë po ashtu hetimin e çdo zyrtari e qeveritari të përfshirë në pazarie klienteliste të cilat ka si synim vetëm përfitimet personale. Tirana, kryeqyteti ynë i dashur, vizioni i shumë të rinjëve në rreth të cilët kërkojnë të punësohen, shtëpia ku po rrisim brezat e rinj, nuk mund të jetë kurrësesi një llokëm mishi derri, që duan ta shqyejnë e të ngjyejnë kriminelët dhe pastruesit e parave andej e këndej detit. Andaj, SPAK duhet të provojë se nuk di të dënojë vetëm qytetarë të cilët mundohen që me 1000 lekë të “korruptojnë” policin rrugor për mos t’i vënë gjobë apo të dënojë shqiptarin që “korrupton” me 50 euro doganierin për të kaluar përtej kufirit, në kërkim të ndërtimit të një jete që në vendin e tij ia vodhën të pangopurit“, shtoi ai.
