Policia e Fierit ka zbardhur vjedhjen me thyerje, të mbetur në tentativë të dyqanit të celularëve, ngjarje e ndodhur 1 javë më parë në këtë qytet.
Policia njoftoi se arrestoi dy prej autorëve të dyshuar dhe ka shpallur në kërkim dy të tjerë.
“Në vijim të punës intensive dhe veprimeve operative hetimore për zbardhjen e ngjarjes së ndodhur orët e para të mëngjesit të datës 17.01.2021, ku u tentua të vidhet me thyerje dyqani i celularëve në pronësi të shtetasit R. C., nga Specialistët për Hetimin e Krimeve në Komisariatin e Policisë Fier, në bashkëpunim me Prokurorinë e Rrethit Gjyqësor Fier, u realizua me sukses operacioni policor i koduar “Agimi”.
Në kuadër të këtij operacioni, u bë i mundur identifikimi i autorëve dhe ndalimi i dy prej tyre, shtetasve Gezim Fejzulla, 32 vjeç, banues në Peshtan, Fier, (i dënuar më parë për vjedhje) dhe Ermal Gremi, 26 vjeç, banues në Zhupan, Fier”, njofton policia.
Ndërkohë, u shpallën në kërkim dhe po punohet për kapjen e dy autorëve të tjerë, shtetasve A. F., 32 vjeç, banues në Peshtan i Vogël dhe G. B., 33 vjeç, banues në Fier.
Gjatë tentativës për vjedhje, autorët janë pikasur nga një punonjës i policisë i cili ka ndërhyrë për të parandaluar vjedhjen duke u përplasur fizikisht me autorët, të cilët gjatë largimit kanë goditur me automjetin e tyre tip “Ford” mjetin privat të punonjësit të policisë.
Po ashtu, sekuestrua në cilësinë e provës materiale automjeti tip “Ford” i cili nga hetimet e kryera rezulton se është vjedhur në Tiranë në datë 13.12.2020 nga këta shtetas, si dhe 6 aparate celularë.
