Gjykata e Posaçme Kundër Korrupsionit dhe Krimit të Organizuar vendosi zbatimin e masës së sigurimit arrest në burg për të ekstraduarin nga Bullgaria, shtetasin turko-shqiptar Rexhep Ipek.
Ky i fundit u ekstradua nga Bullgaria më 21 Janar, pasi ishte shpallur në kërkim ndërkombëtar në shtator të 2019, së bashku me 31 persona të tjerë, në kuadër të operacionit Limit.
Ipek ishte personi i fundit që ishte pa u arrestuar dhe tani më pritet gjykimi i tyre ne themel.
I kontaktuar nga media, mbrojtësit e Rexhep Ipek, Avokat Arbër Hoxha dhe Avokat Dritan Metani u shprehën “Gjykata duhet të mbante parasysh jo vetëm rrezikshmërinë e faktit, por edhe atë të autorit, sidomos për fazën proceduriale në të cilën ndodhet procesi dhe ndaj vendimit do ushtrojmë ankim në Gjykatën e Posaçme të Apelit”.
49-vjeçari ishte shpallur në kërkim si pjesë e një grupi kriminal i goditur në vitin 2019 për trafikimin e kokainës.
Hetimet që çuan në shkatërrimin e 4 grupeve kriminale të trafikut të kokainës dhe kanabisit që përpunohej në vendin tonë dhe trafikohej në Greqi, Turqi dhe vende të BE-së, zgjatën 3 vjet.
Hetimi i Prokurorisë për Krime të Rënda dhe autoritetet greke, u finalizua me operacionin e fundit policor “Limit” me përfshirjen e rreth 300 efektivëve në disa qytete të Shqipërisë (Tiranë, Fier, Vlorë, Gjirokastër, Korçë)
Hetimet të shtrira mes viteve 2016-2019 kanë zbuluar edhe skemën si funksionin këto grupe kriminale. Në Holandë sigurohej fara e kanabisit, më tej kalonte tranzit në Greqi, dhe me ardhjen në Shqipëri bëhej edhe përpunimi në laboratorë të posaçme për kultivimin e lëndëve narkotike. Më tej, droga trafikohej në Greqi, Turqi dhe shtete të tjera të Bashkimit Evropian, ku këto grupe kriminale kishin ngritur rrjetin e vet të shpërndarjes së lëndëve narkotike të llojit kanabis e kokainë.
