Ministri i jashtëm i Greqisë, Nikos Dendias, shpreson që Turqia të ketë një qasje pozitive ndaj një takimi që do të mbahet javën e ardhshme, i cili synon ringjalljen e përpjekjeve të ngecura gjatë për të hapur negociatat mbi pretendimet e diskutueshme territoriale, raporton Reuters.
Vendet fqinjë zhvilluan 60 raunde bisedimesh midis 2002 dhe 2016, por planet që diskutimet të rifillonin vitin e kaluar u prishën pasi Ankaraja dërgoi një anije për të kërkuar burime gazi dhe energjie në ujërat e diskutueshme.
“E vetmja gjë e sigurt është qasja pozitive e Athinës. Shpresoj se pala turke do të vijë në këto bisedime në të njëjtën frymë”, tha Nikos Dendias në një intervistë për Gazetën Efimerida Ton Syntakton.
Ai tha se bisedimet eksploruese, të cilat u ndërprenë në mars të vitit 2016, nuk janë negociata por kanë për qëllim të zbulojnë nëse ka mjaft konvergjencë për negociata të mundshme në të ardhmen vetëm për një çështje specifike.
“Unë dua të jem i qartë, se qëllimi është shënjimi i zonës ekskluzive ekonomike dhe shelfit kontinental në Egje dhe Mesdheun lindor mbi bazën e ligjit ndërkombëtar,” u citua Dendias.
Nëse të dy palët nuk do të arrijnë një marrëveshje pas bisedimeve eksploruese, ata do të duhet të bien dakord mbi një tekst për t’i referuar çështjen Gjykatës Ndërkombëtare në Hagë, shtoi ai.
Ndërsa Athina dëshiron të trajtojë vetëm shënimin e zonave detare në Egje dhe Mesdheun lindor, Ankaraja thotë se të gjitha çështjet duhet të trajtohen, duke përfshirë hapësirën ajrore dhe statusin e disa ishujve grekë në Egje.
“Në bisedimet eksploruese nuk do të ketë diskutim për demilitarizimin e ishujve. Nuk do të ketë asnjë diskutim mbi çështje që kanë të bëjnë me sovranitetin kombëtar”, shprehet Dendias.
