Një 25-vjeçar shqiptar, i identifikuar si Moni Selenica, u arrestua nga policia britanike në Hartlepool. Ai akuzohet se kujdesej për një fermë kanabisi në zonë, raporton media britanike.
Shqiptari u kap, ndërsa një efektiv policie kishte ndjerë aromën e kanabisit gjatë patrullimit në zonë. Polici nisi kontrollin se nga vinte era e kanabisit, ndërsa zbuloi banesën e cila ishte kthyer në një fermë kanabisi.
Fillimisht oficeri i policisë trokiti në derën e banesës, por nuk iu përgjigj askush. Më pas ai trokiti në derën e një tjetër banese në zonë, ku mori informacionin lidhur me banesën nga vinte era e kanabisit.
Në këtë banesë qendronin tre të rinj të huaj, ndërsa përtej murit mund të dëgjohej zhurma e helikave të ventilatorëve të mëdhenj.
Bashkë me dy kolegë të tjerë, polici u fut në “shtëpinë e kanabisit” duke gjetur aty vetëm 25-vjeçarin shqiptar.
Gjatë kontrolleve u gjetën një numër i madh rrënjësh kanabisi me vlerë tregu 152 000 paund.
Në dëshminë e tij në gjykatë, shqiptari u shpreh se kishte shkuar në Angli për një jetë më të mirë dhe se e dinte që kultivimi i kanabisit ishte i ndaluar, por se nuk kishte rrugë tjetër.
Në fund, i riu shqiptar u dënua me 6 muaj burg, ndërsa gjykatësi urdhëroi konfiskimin e të gjitha pajisjeve për kultivimin e kanabisit.
