Ministria e Jashtme ruse paralajmëron Shqipërinë lidhur me dëbimin e diplomatit nga Tirana, me argumentin se ka shkelur masat anti-Covid.
Zv. ministri i Jashtëm Aleksandër Grushko tha për mediat ruse ky është një provokim i qartë që nuk do të mbetet pa përgjigje.
“Ky është një provokim i qartë që synon përkeqësimin e marrëdhënieve ruso-shqiptare dhe, natyrisht, ky hap jo miqësor nuk do të mbetet pa përgjigje,” tha Aleksandër Grushko zv. Ministri i Jashtëm rus për Sputnik.
Më parë Rusia si kundërpërgjigje ndaj dëbimit të dy diplomatëve, dëboi nga Moska dy punonjës të ambasadës shqiptare atje. Ndoshta edhe në rastin e fundit, Moska do të përdorë të njëjtën formulë, duke dëbuar nga Rusia, ndonjë prej diplomatëve shqiptarë.
Shqipëria shpalli “non grata” dhe dëboi diplomatin rus, Alexey Krivosheev, me detyrë Sekretar i Dytë i Ambasadës ruse. Sipas Ministrisë së Jashtme shqiptare, diplomati kishte shkelur në mënyrë të vazhdueshme karantinën gjatë muajit prill duke lëvizur jashtë orarit të lejuar.
Po ashtu, diplomati rus dilte pa maskë në ambiente publike. Një fakt i tillë është konsideruar i papranueshëm për autoritetet shqiptare duke marrë masën ekstreme, shpalljen “non grata” dhe kërkesën që të largohet për 72 orë nga Shqipëria.
Ky është rasti i parë kur një shtet vendos të shpallë nongrata dhe të dëbojë një diplomat për shkeljen e masave anti-Covid.
